Шке участкыште туалетым «йоҥылыш» вераҥдымылан мут кучаш шогалтен кертыт мо?
А.Красавина.
Семеновко посёлко.
Вашмутым Роспотребнадзорын Марий Элысе управленийын пресс- службыштыжо пуэныт:
— Такшым частный участкылаште тергыше орган-влак шке гыч туалет- влакым огыт терге. Тидлан тӱҥ шотышто пошкудо-влакын вуйшиймашышт амалым пуа. Сандене туалет озан ответственностьшым кок категорийлан шелаш лиеш: граждан да административный.
Гражданско-правовой ответственность шотышто, туалет СанПиН нормо дене келшышын огыл шке гыч ышталтын да пошкудо-влакын интересыштлан мешая але праваштым пудырта гын, тудым кораҥдаш логалеш. Но тидым ышташ пунчалым суд лукшаш. Каласен кодыман: ИЖС ден дачный участкылаште ыштыме туалетлан СанПиН нормо вес тӱрлӧ:
Дачный участкыште туалет пошкудын илыме пӧртшӧ да нӧреп деч 12 метр деч лишне лийшаш огыл; таве але йӱшаш вӱдым налме вер деч 8 метр деч лишне лийшаш огыл; пошкудо участке чек деч ик метр деч лишне лийшаш огыл.
Туалетан участке населённый пунктын чекыштыже вераҥын гын, тунам СаНПиН нормо эшеат чоткыдырак: тудо илыме оралте, йоча учреждений да тӱшка калыкын каныме верже деч 20 метр деч лишне, таве але памаш деч 50 метр лишне лийшаш огыл. Но туалетын кушто вераҥме норматившылан гына виеш тудым кораҥдыктен огыт керт, пошкудо-влак вуйым шийыт гын веле тидым ышташ логалеш. А теве моральный эҥгек шотышто шоналтыман. Туалет деч сай огыл пуш шарла гын, суд практикыште озажым мут кучаш шогалтыме сучай-влак лийыныт. Тӱҥ шотышто СанПиН нормым шуктыдымымак шотыш налыт. Мутлан, туалетыште 3 метр келгытан лаке лийшаш. Тушто мо улшыжат 35 сантиметр деч ӱлнырак шинчышаш. Идалыклан ик гана тудо эрыкталтшаш. Дезинфицироватлыме пашамат эре гаяк шуктыман. Тыге ок лий гын, пошкудылан моральный эҥгекым компенсироватлашак логалеш.
Тыгак «йоҥылыш» туалетын озажлан, Административный правам пудыртымаш кодекс дене келшышын, штрафымат тӱлаш ыштен кертыт.
Мутлан, санитарно-эпидемиологический да экологий нормым шуктыдымылан 1 гыч 2 тӱжем теҥге марте, мландым локтылмылан 3 гыч 5 тӱжем теҥге марте, водоохранный кумдыкышто участке дене пайдаланыме правилым пудыртымылан 3 гыч 5 тӱжем теҥге марте да вӱд объектым аралыме правилым пудыртымылан вичшӱдӧ гыч ик тӱжем теҥге марте.
С.Носова ямдылен.
