12 октябрьыште «Шолшо точко – Йошкар-Ола» коворкинг-рӱдерыште ача-ава-влакын республикысе погынымашышт эртен. Тудым Марий Элын образований да науко министрже Н.Адамова, Кугыжаныш Погын председательын алмаштышыже О.Цветкова вӱденыт.
Тыгай шотан погынымаш регионыштына икымше гана лийын. Видеоконфереций кыл полшымо дене йодышым залыште шинчыше ача-ава гына огыл, районлаште улшо-шамычат пуэн кертыныт.
Наталья Адамова Марий Элыште образованийын вияҥме ончыкылыкшо да кызыт могай улмыж нерген каласкален. А ача-ава-шамыч тургыжландарыше йодышым шинчаваш пуэныт да регионыштына пашам ыштыше образований дене кылдалтше программе ден проект-влакын кӱлешан улмышт, нунын могай лектышым пуымышт нерген ойленыт.
Л.ШАБДАРОВА.
