УВЕР ЙОГЫН ЭКОЛОГИЙ

Российыштыжат ик эн виян

Тазалыкым пеҥгыдемдыме «Шап» комплексыште «Чодыра проект-влак» школ лесничествылаште тунемше-влакын республиканский школ-слётышт эртен.

Чодыра пашан самырык йолташыже-влак дене вашлияш Марий Элын Пӱртус поянлык, экологий да йырым-йырысе средам аралыме министерствыжын, Чодыра пашам виктарыше межрайонный управлений, арендатор-влакын, «Розовый одуванчик» республикысе экологий организацийын вуйлатышышт да еҥышт миеныт. Чылаже республикысе школ лесничествыла гыч 68 участник лийын. Нуно шке шинчымашыштым веле огыл ончыктеныт, тыгак чодыра паша дене кылдалтше шуко уым пален налыныт. Пушеҥгын породыжым, ийготшым рашемденыт, навигатор, карт дене пашам ыштеныт, чодыралык озымым шынденыт — чыла тиде кок кече жапыште шуктымо заданийын изи ужашыже веле.

Икымше кечын «Чодыра многоборьен» 16 йыжынжым эрташышт логалын. Тушто эн сай лектышым Шернур район ончыктен. Козьмодемьянск ден Звенигово районла гыч йоча-влак кокымшо ден кумшо лийыныт.

 Кокымшо кечын  слетын участникше-влак пӱртӱсым аралыме дене кылдалтше «Пожарлан — уке», «Чодыра прессе», «Чодыра дозор» мероприятий-влакым организоватлен да эртарен колтымаште таҥасеныт. Школ лесничествым вуйлатыше-влаклан туныктымо тренинг эртаралтын.

 Каласен кодыман, тений республикысе школ лесничестве системым Российыштыжат ик эн виянлан шотленыт. Тудын радамжат кок пачаш кушкын. Ынде нуно 76 школ пелен пашаштым ворандарат. Тиде школ-слёт Россий Президентын грант-проект конкурсыштыжо сеҥымылан кӧра эртаралт кертын. Проектым «Охрана леса» организаций темлен.

 С.Носова.

 

Опубликовать в Одноклассники

Добавить комментарий