Оза деч посна ок лий
Пачерым налме шотышо документым Единый кугыжаныш недвижимость реестрыш пуэнна. Но мыланна чыла пӧртылтеныт, молан манаш гын пачер оза собственностьшо дене кылдалтше пашам шкеж деч посна эртараш огеш лий манме йодмашым возен. Тудо ик ий ончыч пачерлан документшым йомдарен, иктаж-кӧ тидым шке шонымыж семын кучылт кертеш манын шона. Кызыт тудо пачержым ужалынеже, садлан риэлторлан доверенностьым ыштен. Озалан ынде мом ыштыман?
А.ИВАНОВА.
Советский район.
Йодышлан Марий Элысе Росреестр управленийын специалистше вашешта:
– Пачер оза собственностьшо дене кылдалтше пашам шкеж деч посна эртараш огеш лий манме йодмашым Росреестрышке возен гын, тыланда права шотышто кугыжаныш регистрацийым эрташ ужалышылан пуымо йодмашыжым шӧраш кӱлеш. Пачер оза тидым ок ыште гын, собственностьшо дене кылдалтше пашам шкеж деч посна эртараш нигузе огеш лий.
Л.ШАБДАРОВА.
