9 октябрьыште Йошкар-Олаште, Агробизнес кадрым уэш ямдылыше марий институтышто, калык да йӱла-влак кокласе кыл шотышто специалистлан тунемаш пурышо-влакын занятийышт тӱҥалын.
Тыгай специалист-влакын кӱлешлыкышт нерген марий юмыйӱла ушемын еҥже, моло мер пашаеҥ-шамыч эше 2000 ийла тӱҥалтыштак ойлаш тӱҥалыныт. Марий юмыйӱла моло религий семынак чыла шотыштат тӧр праван. Тидым 1997 ий сентябрьысе «О свободе совести и вероисповедания» федеральный закон пеҥгыдемда. Тудын дене келшышын Юмыйӱла ушемымат регистрироватлаш йӧн лектын. Эн ончыч, 2004 ийыште, тидым Шернур общине ыштен. Таче регистрацийым эртыше общиныже лучкышкат погына.
Моло йӱлам кучышо-влакын тунемме пашаштым сайынак йол ӱмбак шогалтеныт гын, марий юмыйӱлан тудо пырчын-пырчын ышталтеш. Пагалыме онаеҥ-влак кумалтыш сомылымат вӱдаш, общинын пашажымат виктарен колташ вийышт сита гын, юмылан тау. Но организацийын пашажым закон почеш шукташ, тачысе илышын йодмыжым шуктен виктараш жаплан келшыше шинчымаш, мастарлык кӱлыт. Тидланже Россий Федерацийын кугыжаныш национальный политике стратегийжым, культур поянлыкым арален кодымаште законодательствым, тӱнямбал религий ден Марий юмыйӱла ойыртемымат, шийвундо шотымат палыман, граждан обществыште моло йылме дене мутланыше, йӱлам кучышо-влак дене икойыш шуын пашам ыштыме нергенат мондыман огыл, отчетымат чын да жапыштыже пуыман, проектымат возен, эсогыл калык коклаште кутырен, шке шонымашым почын пуэн моштыман. Чыла тиде да эше ятыр моло теме дене лекций-влакым, МарГУ, МарНИИЯЛИ, Агробизнес кадрым уэш ямдылыше марий институт гыч профессор, кугурак научный пашаеҥ, специалист-влак лудыт да тыгак практический занятийым эртарат. Практике семын кумалтышлашке лектыт, да туштыжо онаеҥ-влакын ойыштым колыштыт.
Тунеммашке ушнышо-влакым Тӱҥ онаеҥ А.Таныгин, Оньыжа Э.Александров, Марий Эл правительстве вуйлатышын икымше алмаштышыже М.Васютинын секретариатшым вуйлатыше Э.Чемышев, культур, печать да калык-влакын пашашт шотышто министрын алмаштышыже М.Матвеев, калык да конфессий-влак кокласе кыл шотышто пӧлка вуйлатыше И.Садовин, институтын тунемме да шанче-методике паша дене икымше проректоржо И.Стукова, Йошкар-Оласе «Марий кумалтыш» общинын еҥже А.Степанов саламленыт.
Тунемаш еҥ-влакым чумырымо пашам республикысе Юмыйӱла ушем, Йошкар-Оласе «Марий кумалтыш» общине шуктеныт. Общинынак еҥже-влак кугыжаныш структурыш йодмаш дене лектыныт, варажым тунемме заведений дене тунемме планым келыштареныт.
Тунеммашке коло утла еҥ ушнен. Нуно Йошкар-Ола, республикысе районла, тыгак Татарстан, Башкортостан, Удмуртий республикла, Казань, Москва гыч улыт. Кугыжаныш образецан дипломым июньышто кучыкташ палемдыме. Но тылеч ончыч лекций, практике, реферат, зачет, экзамен…
Тӱҥалтыш ышталтын. Тудо тӱвыргӧ лектышан лийже!
Светлана Пехметова.
М.Скобелевын фотожо.
