УВЕР ЙОГЫН

Мемнамат, газетнамат вучат

Звенигово районысо Керебеляк (ончыч Дубовка маналтын) ялын уремже моткоч кужу. Автомашина дене кудал кӱзымӧ годым уремын кужытшо кок меҥгышкат шуэш докан, шоналтенам семынем. Ялыште тошто, лунчырген пытыше оралте моткоч шуко. Теве ик пӧртын  моторын пӱчкеден лукмо окнасергаже шинчамлан перныш. Векат, тыште тале кидмастар илен. А кызыт окна шӱлакаҥше, пӧрт шукертак пустаҥын. Жапше годым туштат йоча-влакын юарлен модмо йӱкышт шергылтын, очыни. А кызыт ончет да кумыл тодылалтеш. Уэмден ыштыме але чоҥымо у пӧрт-влакат огыт кой. Шижалтеш, самырык-влак, ешым чумырымекышт, шочмо ялыштышт огыт код. Я ик капка ончылно, а вес сурт воктене конден оптымо блок, кермыч тӱшка шинчалан перненыт. Стройматериалым налыныт гын, тугеже чапле сурт-оралте-влак вашке лийыт, очыни.

Ошман, верын-верын шаршудан корно дене эртыме годым Памашсола ялын ик сад-пакчашкыже логалмыла чучын. Кажне гаяк сурт ончылно – саскалан поян олмапу, воктеныжак поланвондо чеверын койын шогат. Корно воктенак шуанвондо, шем пызле кушкыт. Нунат тений кажне кумылан еҥым сийлаш ямде  улыт.

— Самырыкрак годым уремыште тынар шуко кушкыл шочынат огыл. Йоча-влак модын куржталыштыныт, транспорт дене кудалыштыныт, — мемнам ужын, мутланен, ваштарешна илалше ӱдырымаш эркынрак гына ошкыл тольо. — Кызыт пакчаштат, уремыштыт — чыла вере саска. Ялыштына утларакше илалше-влак веле кодыныт. Самырык-шамычын ялыште илымышт ок шу, шукынжо Стройкышто (Выльыпсола ялым тыге ойлат) пашам ыштат, туштак илат. Шолэҥерыш, Йошкар-Олаш, Казаньыш але Москвашкат пашам ышташ кудалыштыт. 

Антонина Изосимовна Анисимова — вич шочшан ава. Кызыт шкетын ила. Но кажне каныш кечылан эргыж ден шешкыже, уныкаже-влак толын каят. Адакшым воктел пӧртшӧ – Володя эргыжын.

— Кеҥежым пӧртыштӧ моткоч шукын погынена. Такшым поян кова улам: эргым-шешкым-влак, индеш уныкам, нунын кум шочшышт улыт.

Антонина Изосимовна самырык годымак дояркылан ышташ тӱҥалын да ӱмыржӧ мучко ты сомылым шуктен. 50 ияш сулен налме канышыш лектын гынат, ятыр ий пашаш коштын. А кызыт 80 ийыш тошкалше ковайым йол корштымо витара.

— Тиде ял гычак Антонина Лаптева дене пашам пырля ыштенна. Ынде котынат йолнам пыкше шӱдырена, — кумылжо тодылалтме гай лие А.Анисимова.

Тӱрлӧ нерген мутланыме годым «Марий Эл» газет гыч улмынам пален налмеке,  Антонина Изосимовнанкумылжо йӧршын вашталте, веселаҥе. Вет жапше годым тудат кажне паша кечын лекше марий газетым чон вургыж вучен да ик лаштыкым кодыде лудын.

— Шукерте огыл шинчамлан операцийым ыштыктенам. Ны ончаш, ны лудаш, пеш йокрок ыле чонемлан. А ынде кертам, шинчалыкем чием да пеш кертам. Тольык газетше мемнан деке ок тол шол! — порын ончалын, пелештен ковай. — Вет ялыште газетлан подпискыжым ыштышыжат уке да почтальонжат огеш тол. Газетлан возалтат гынат, почтыш миен налман, маныт. Йӧра, кеч пенсий оксам Звенигово гыч толын пуэн кодат. 

Антонина Изосимовнам вес йодышат тургыжландара: ялыште кевыт уке.

— Шоҥгыеҥ-влаклан илаш йӧсӧ, кеч иктаж-кӧ изирак лапкым конден шогалтыже ыле, — мане ковай.

Иктаж-мом налаш кӱлеш гын, илалше ӱдырамаш кунам шкеже корныш лектеш, а кунам гын эрге-шешкыжым йодеш, ял гыч кайышыланат налын кондаш каласа.

Ковайын волышо кумылжым нӧлталаш манын, «Марий Эл» ден «Сурт-пече» газет-влакым кучыктышна. Тудо куаныш да ужатен каласыме семын веселанрак мане:

— Те чӱчкыдынрак мемнан деке толза. Ме тендам эре вучаш тӱҥалына!

Урем дене умбакыже кудалын эртыме годым вуйышто тӱрлӧ шонымаш пӧрдеш. Жапше годым кажне марий ешыште шочмо йылме дене лекше газетым, журналым лудыныт. А кызыт? Илыш вашталтын. Ик газетлан кӧра почтальон вес ялыш огешат кошт улмаш. Тыге лектеш: лудаш кумылан-влакым газет деч тыге йӱкшыктарат.

А.Байкова.

М.Скобелевын фотожо.

Опубликовать в Одноклассники

Добавить комментарий