Москвасе «Сеҥымаш тоштер» ден Россий почто «Сеҥымашын кожшым» сӱретле» конкурсым увертареныт.
Организатор-влак самырык сӱретче-шамычлан коллекцийлык открыткын комжым сӱретлаш темлат. Конкурсыш ушнышо-влак Кугу Отечественный сарыште Сеҥымашлан пӧлеклалтше пайрем тематике дене кылдалтше сӱретым ыштышаш улыт.
«Мемнан фондышто сар дене кылдалтше шуко серыш ден открытке улыт. Сар — тиде кредалмаш веле огыл, эше тылысе илышат. А сар мучашлан калыкна нойышо лийын, лачшымак совет салтак-влакын сеҥымашышт нунылан ончыкыжым чылажат сай лийшашлан ӱшаным пуэн. Санденак кызытсе тукымлан ме тидын шотышто фантазироватлаш йӧным пуэна», — палемден тоштерын директоржо Эльдар Янибеков.
Сӱрет-влак тудо жаплан келшен толшаш, пайремын шӱлышыжым ончыктышаш улыт. Конкурсыш ушнышо-влак шке пашаштым коча-коваштын ойлымышт почешат ыштен кертыт. Сӱрет пелен ончыктымо событий дене кылдалтше ойлымашымат колташ лиеш.
Чыла пашам 1 гыч 31 октябрь марте колтыман. Конкурсыш 7 гыч 17 ияш марте ийготан-влак ушнен кертыт. Ойыртемалтше-влакым кум номинацийыште палемдаш тӱҥалыт: 7-10, 11-14, 15-17 ияш-влак коклаште. Финалыш лекше-влак 18 ноябрьыште палыме лийыт. Индеш еҥын пашаштым коллекцийлык открытке-влакым ышташ кучылтыт. Тудым 2 тӱжем экземпляр дене луктыт.
С.Носова.
