Звенигово оласе «Водник» стадион пелен визымше гана кадет ден казак-влакын шыже сборышт эртен.
Таҥасымашке Звенигово ден Волжский районласе кадет, казак класслаште тунемше-влак миеныт. Мероприятийым Звенигово ола администраций, Кокшайскысе станичный казак обществе да Марий митрополийын Олык-марий благочинийже эртареныт. Чылаже тушто куд команде шке вийжым терген. Вич конкурс лийын: огневой ямдылалтмаш, автомат да противогаз дене куржталмаш, челночный куржталмаш, мишеньыш спортивный кӱзым кышкымаш, арама воштырым руымаш, историй дене викторине, кандырам шупшмаш.
Чыла команде сай лектышым ончыктен. Поснак оҥайын автоматым кучен, противогазым чиен куржталмаш эртен. Кандырам шупшмаш конкурсышто гын южо командылан тидым эсогыл ныл ганат ышташ логалын.
Сеҥышыш Волжск ола гыч «Защитник» сарзе йӱла клуб лектын. Кокымшо верым Кокшайскысе Александр Невскийын лӱмжым нумалше военно-патриотический клуб, кумшым Звенигово лицейын «Факел» клубшо налыныт. Сеҥыше-влакым грамот, медаль да шарнымаш пӧлек дене палемденыт. Моло участникланат кумылаҥдыше призым кучыктеныт. Таҥасымаш деч вара чылаштым полевой кухньышто ямдылыме шокшо кочкыш вучен.
С.Носова.
