КУЧЕМ УВЕР УВЕР ЙОГЫН

Оза мутым кучышаш

Марий Эл вуйлатыше А.Евстифеев Советский районышто ялозанлыклан кӱлеш, но кучылталтдыме мланде шотышто совещанийым эртарен, увертара Марий Эл вуйлатышын организаций да аналитике виктемже.

Советский районын кумдыкшо 142 тӱжем гектар. Тушеч 45 процентше  ялозанлыкыште кучылталтеш. Район администрацийым вуйлатыше А.Трудиновын мутшо почеш, мландым 18 ялозанлык предприятий обрабатыватла, но икмыняр ужашыже шуко жап яра кия. Индеш тӱжем наре гектарым келгын куралман, 12 тӱжем гектарыштыже гын чодыра кушкын шогалын.  Мланде пайдалын кучылталтше манын, администраций у инвестор-влакым ӱжаш темла, но тидлан мландын кызытсе озаже-влак дене чылажымат шотыш кондыман. Мланде оза тудым кӱлеш семын огеш кучылт, мланде яра кия гын, собственникым судыш пуаш лиеш. Нуно умбакыжат огыт тарваныл гын, мландым поген налаш амал лиеш. Тыге каласеныт республикым вуйлатыше А.Евстифеев ден Марий Элын ялозанлык да продовольствий министрже А.Гречихо.

А.Евстифеев тыгак шопо мланде шотыштат мутым луктын. Советский районышто мландын шурным шочыктен кертме вийжым уэмдыме пашам 2006 ий гычак огыт эртаре. Куралме мландын лу процентшым гына «уэмдат». Туге гынат пасулашке известкам шавыме пашам чарыман огыл манын каласен тудо. Александр Гречихон мутшо почеш, ты пашалан федеральный бюджет гыч  мелиорацийым эртарыме мландылан оксам ойырат.

Александр Евстифеев, совещанийым иктешлышыжла, район вуйлатыше-шамычлан  мланде оза, арендатор-влакын реестрыштым ямдылаш, нунын дене мландым кӱлеш семын кучылтмо шотышто мутланаш кӱштен.

Тыгак республик вуйлатыше  «Росспиртпром», «Фокинский ликёроводочный завод» ОАО-н, «Ново-Фокинский ликёроводочный завод» ООО-н кумдыкшым ончен коштын. Шке жапыштыже нине предприятий-влак республикын бюджетышкыже ятыр налогым тӱленыт, калыклан ятыр паша верым пуэныт.

Тылеч посна Роҥго карьерын пашаж дене палыме лийын. Тушто шопо мландыш шавашлан известка ложашым, асфальт ден бетон, органоминеральный  вартышым ямдылаш кӱлшӧ минеральный порошокым кундемыштына ик эн шуко ыштен луктыт. Тиде предприятий 1955 ий гыч пашам ышта.  Совет жапыште тушто идалыкыште 120 тӱжем тонн известка ложашым ямдыленыт.  Кызыт  мландыш известкам шагалрак шавымылан да йодмаш иземмылан кӧра  известка ложашым ятырлан шагал луктыт. Эртыше идалыкыште 10,4 тӱжем тонным гына ямдыленыт. Йодын налше лиеш гын, предприятий паша куатшым шукемдаш ямде. Республик вуйлатыше ден предприятийын еҥже-влак тиде пашам вияҥдыме шотышто мутланеныт.

Л.ШАБДАРОВА.

Д.Речкинын фотожо.

Опубликовать в Одноклассники

Добавить комментарий