Ялозанлык мландым кӱлеш семын курал огыт ӱдӧ, огыт кучылт, тыгай оза-влак шотышто пеҥгыде мерым ышташ тӱҥалыт, эсогыл мланде кумдыкым поген налме марте шуын кертыт.
Тидын нерген Марий Эл вуйлатыше Александр Евстифеев республикысе муниципал образований администраций вуйлатыше-влаклан эртарыме совещанийыште ойлен, палдара Марий Эл Республик вуйлатышын организаций да аналитике виктемже.
Мутланымаште ӱдымӧ кумдыкым арален кодышаш, ялозанлык значениян мландыште пайдале пашам эртарыме, йодмаш дене пайдаланыдыме мланде пай улмым пален налме, оформитлыме да муниципал образований велым контроль лийшаш, республикысе озанлыклаште пасу паша кузе шукталтме нерген йодыш-влакым каҥашеныт.
Марий Эл вуйлатыше южо муниципал образований вуйлатыше деч молан нунын районын пырчан культурым поген налмаште почеш кодмышт, шурным кушко ужалымышт, пайдаланыдыме ялозанлык мланде кумдыкым иземдыме шотышто могай пашам эртарымышт, моло нергенат йодын.
Верысе самоуправлений орган-влакын уверышт почеш, тачысе кечылан республикыште кучылтдымо ялозанлык мландын тӱрыс кумдыкшо – 317 тӱжем гектар. Вич ий жапыште 35 тӱжем гектарыштыже пашам ышташ тӱҥалме. Тышеч ӱмаште – 6 тӱжем гектар мландыште, тений пел ийыште – 4000 гектарыште.
— Тыгай темп дене мландым те 80 ий пӧртылташ тӱҥалыда. Мемнан кокла гыч шукынжо тиде сеҥымашым ужынат огыт шукто, — каласен республик вуйлатыше. – Тиде – мыланна кӱлшӧ скорость огыл. Южо районышто гын пайдаланыдыме мландым пӧртылтымӧ шотышто йӧршеш нимо огеш ышталт.
Тӱҥ чаракше – мланде оза-влакын ты шотышто шонымашышт. Нуно мландым огыт курал-ӱдӧ, тыгодым тудым мӧҥгеш муниципалитетышкат огыт пӧртылтӧ. Ты шотышто улшо законодательстве, тыгай мланде оза-влаклан могай мерым приниматлаш лийме нергенат ойленыт.
Ялозанлык кӱлешлык мландым утларак пайдалын кучылташ тӱҥалаш манын, районысо кучем-влаклан тудын могай улмыж нерген анализым, радамле инвентаризацийым да мландым муниципал собственностьыш пӧртылтымӧ шотышто адресный пашам ыштыман.
Александр Евстифеев тыгак заготовительный паша шотышто йодышым ончен лекташ темлен. Тудо палемден, Марий Эл – Российысе рынкыш экологический яндар кочкыш йӧрварым темлен кертше регион. Тидлан заготконтор-влак сетьым ыштыман. Тыгодым тӱҥ условийже – нунын пашашт легальный манме налогообложениян лийшаш. Л.Камалетдинова.
