«Идалыкын книгаже» конкурс тений кандашымше гана эртаралтеш.
Тудым Т.Евсеев лӱмеш национальный книгагудо Марий Элын Тӱвыра, печать да калык-влакын пашашт шготышто министерствыжын полшымыж дене эртара. Тушко книгам савыктыше посна еҥ, автор, полиграфический организаций-влак ушнен кертыт. Конкурсыш 2017-2018 ийлаште лекше савыктыш-влакым темлаш лиеш.
Сеҥыше-влакым 14 номинацийыште палемдаш тӱҥалыт:
«Идалыкын эн сай книгаже» — тӱҥ премий;
«Книган эн сай полиграфийже»;
«Эн сайын оформитлыме книга»;
«Марий йылме дене эн сай книга»;
«Марий Эл Республик нерген эн сай книга»;
«Эн сай научный савыктыш»;
«Эн сай тунемме савыктыш»;
«Эн сай художественный прозо»;
«Эн сай поэтический сборник»;
«Йоча-влаклан эн сай книга»;
«Шочмо кундем нерген эн сай книга»;
«Марий Элын ойыртемалтше еҥже-влак нерген эн сай книга»;
«Лудшо-влакын симпатий призышт» — Марий Эл Республикын лудшо-влакын сообществыжын посна премийыже;
«Библиотек дене кылым чолган кучымылан» — Т.Евсеев лӱмеш национальный библиотекын кумылаҥдыше дипломжо да премийже.
Конкурсыш йодмашым 20 сентябрь гыч 20 ноябрь марте тыгай адрес дене колтыман: Йошкар-Ола, Пушкин урем, 28-ше №-ан пӧрт.
С.Носова.
