Кодшо шуматкечын Йошкар-Олаште, Машиностроитель ден Подольский курсант-влакын уремышт ушнымаште, Сарзе пограничник-влаклан шарныктышым почыныт.
Тудым тылзе утларак жапыште ыштен шуктеныт. Памятник монолит плиташ вераҥдыме стелле семын ышталтын. Тудым кремический кермыч дене оптымо да мрамор ден гранит плита дене облицоватлыме. Ӱмбалныже возен шындыме: «Пограничникам всех поколений, защитникам всех рубежей Родины». Тыгак гравировко йӧн дене пограничный войскан илышыж гыч фрагментым ончытымо. Шарныктыш воктенак пограничный меҥге ден флагштокым вераҥдыме. Стелле ончылно пеледышым шындаш кум кугу вазым келыштарыме.
Памятникым ышташ темлымаш дене Пограничник ветеран-влакын «Застава» Марий Элысе региональный мер организацийже лектын улмаш. Тудым Михаил Суслов вуйлата. Шарныктышым ыштыме дене кылдалтше проект Йошкар-Олаште верысе калыкын тӱҥалтышыжлан полышым пуымо шотышто республиканский конкурсышто сеҥышыш лектын да 500 тӱжем теҥгеаш грантым сеҥен налын. Республикысе бюджет 410 тӱжем теҥгем ойырен гын, Йошкар-Ола администраций — 35 тӱжем теҥгем. 55 тӱжем теҥгежым спонсор-влак пуэныт.
Шарныктышым почмашке Марий Эл Республик Правительствын, Йошкар-Ола администрацийын еҥже, пограничник ветеран, кадет-влак толыныт ыле.
С.Носова.
Снимкылаште: памятникым почмо годым: ветеран пограничник Леонид Порохин.
М.Скобелевын фотожо.
