КУЧЕМ УВЕР

«Мланде яра кийышаш огыл»

Марий Эл вуйлатыше А.Евстифеев республикыште яра кийыше мландым пайдалын кучылташ кӱлмӧ нерген оперативный совещанийым эртарымыж годым тыге ойлен, увертара Марий Эл вуйлатышын организаций да аналитике виктемже.

Александр Евстифеевын мутшо почеш, кундемыштына курал-ӱдымӧ мландын кумдыкшо 2000 ий гыч палынак изем толеш. Верысе самоуправлений орган-влакын пуымо уверышт дене келшышын, ялозанлыкыште  кучылталтше да кызыт пайдаланыдыме мландын кумдыкшо 317 тӱжем гектарыш шуын.  Марий Элын Кугыжаныш пого министерствыжын данныйже почеш, кызыт республикыште ялозанлыкын кӱлешланже ойырымо 302 тӱжем гектар мландым, 119 тӱжем гектар куралме пасум, кӱтӱм коштыктымо 56 тӱжем гектар, 22 тӱжем гектар шудылык, шуко жап яра кийыше 105 тӱжем гектар мландым огына кучылт.

Марий Эл вуйлатыше чыла нине мландым кучылташ кӱлмым палемден. Тидлан мутым кучышо структур-влаклан кӱлынак пашашке пижаш, регионысо кучемлан да надзорный орган-шамычлан кӱлеш мерым шукемдаш кӱлмӧ нерген каласен.

Республикын ялозанлык да продовольствий министрже А.Гречихо,  Марий Элын Росреестр управленийжын статистикыж дене келшышын, кундемыштына  ялозанлыкын кӱлешланже ойырымо  мландын кумдыкшо тичмаш налмаште 768 тӱжем гектарым, курал-ӱдымӧ мланде 703 тӱжем гектарым, куралме мланде 434 тӱжем гектарым айла манын ойлен.

2000 ийыште 633 тӱжем гектар мландым куралыныт гын, тӱжем гектар яра киен, 2005 ийыште 525 тӱжем гектарым куралыныт гын, 58 тӱжем гектар мландым кучылтын огытыл, 2010 ийыште 454 тӱжем гектар куралме мланде кучылталтын огыл, 98 тӱжем гектар мланде шуко жап куралде киен, 2017 ий январьыште 434 тӱжем гектар куралме мландым обрабатыватлыме огыл, 105 тӱжем гектар шуко жап  куралдыме мландылан шотлалтын.

Ялозанлыкыште кучылталтше, но пайдаланыдыме мландым «пашашке колтымаш»  ялозанлык производствым вияҥдымын ик эн тӱҥ йӧнжӧ. Молан манаш гын тидын дене ӱдымӧ кумдык гына огеш кугем, тыгак  лектышат кушкеш, у паша вер, ялозанлык продукцийым шукырак ямдылаш йӧн лектеш.

Профильный министерствын палемдымыж почеш, яра кийыше мландым уэш курал-ӱдымӧ паша эркынрак кая.  Пытартыш вич ийыште  тыгайже 35 тӱжем гектарыш гына шуэш. Мутлан, ӱмаште куд тӱжем гектарым «пашаш колтымо».  Тений икымше пелийыште эше ныл тӱжем гектар «яра» мланде кучылталташ тӱҥалын. Эн кугу показатель – Морко (1500 гектар), Звенигово (914 гектар), Советский (470 гектар) районлаште.

Тичмаш налмаште, республик мучко кугу паша ышталтшаш, молан манаш гын мланде шуко ий дене яра киен, сандене ялозанлыкыште пайдаланыме могырым тудын акше изи.

Л.ШАБДАРОВА.

Опубликовать в Одноклассники

Добавить комментарий