Тиде ий Российыште волонтёрын суапле пашажлан пӧлеклалтын. Тудын кышкарыште «Российын доброволецше-2018» всероссийский конкурс 19 март гыч 5 декабрь марте эрта. Марий Элысе этап 25 сентябрьыште Самырык-влакын полатыштышт лийын.
Заочный этапыш 200 утла йодмаш пурен гын, жюри финалыш 11 организаций гыч 44 волонтёрын пашажым луктын. Мероприятийым почмаште Марий Эл правительстве председательын икымше алмаштышыже М.Васютин лийын. Михаил Зиновьевич конкурсын кӱлешлыкше да тудым шке шонымашым шыҥдараш полшышо кумдык дене таҥастарен.
Чылаже конкурс жапыште 13 площадке пашам ыштен. Кажныштыже ӱдыр-рвезе-шамыч пашашт дене палдареныт. Теве, мутлан, Е.Инварисован «Порылык ярмиҥга» проектше инвалид йоча-влаклан полышым пуаш ышталтын. Тудо шке йырже чолга ӱдыр-рвезе-влакым чумырен. Нуно тазалык шотышто ойыртемалтше икшыве-шамычлан оксам погат. Тиде сомылым нуно 2007 ий гычак виктарат, санденак шке фондышт уло. 2014 ийыште тушто 49 тӱжем теҥге лийын гын, 2015 ийыште 73 тӱжемыш погынен.
Тыгак Йошкар-Оласе сервис технологий техникумын тунемшыже Валентина Петрован «Кудывечынан пайремже» пашаже шкешотан. Тудо кундемнан самырык тукымжым таза илыш-йӱлам кучаш тарата, тыгак йолташыже-шамыч дене пырля Йошкар-Олам тӱзаташ полша. Конкурсышто ончыктымо проектше йоча-шамычлан шукертак мондалтше модыш-влакым шарналташ полша. Техникумын 15 студент-волонтёржо ӱдыр-рвезе-шамыч дене коча-кованан жап годсо модыктымышт нерген каласкаленыт. Нуно ӱшанат, тидыже йочам компьютер воктеч мыняр-гынат кораҥдаш полша.
Жюри кажне площадкыште сеҥышым палемден. А конкурсын Российысе финалже 5 декабрьыште Москваште лиеш.
Л.ШАБДАРОВА .
