19-20 сентябрьыште Екатеринбургышто «Лесоруб-2018» Российын чемпионатше кудымшо гана эртен.
Тушко чодырам йӧрыктышӧ 24 команде Российын тӱрлӧ регионжо гыч миен. Нунын коклаште Марий Эл гычат команде лийын. Тудын составышкыже Юл кундем кугыжаныш технологический университетын тунемме-опытный лесхозшын специалистше-влак пуреныт. Чемпионатыш миен толаш Марий Элын Пӱртус поянлык, экологий да йырым-йырысе средам аралыме министерствыже, Чодыра дене пайдаланыше-влакын ушемышт полшеныт.
Участник-влаклан чодырам бензопила полшымо дене йӧрыкташ, чепым вашталташ, пырням тӱрлӧ йӧн дене пӱчкедаш, пушеҥге йытыр деч укш-влакым ойыраш логалын. Тыгак форвардер дене пырням опташ да ястараш, чодырам ямдылыше кугу тоннан автомашинам виктарен ончыкташ кӱлын. Участник-влак посна-посна да команде денат таҥасеныт.
Куанен палемдыман, чыла конкурс иктешлалтмеке рашемын: Марий Эл гыч мийыше команде Российыштыжат ик эн виян. Мутлан, оператор-влак коклаште участникна Владимир Матевеев кумшо верыш лектын. Юниор-влак коклаштат Марс Салеев кумшо лийын. Оператор-влакын командный первенствыштыже мемнан-влак адакат кумшо верым сеҥен налыныт.
С.Носова.
Снимкылаште: Марий Эл гыч чодырам йӧрыктышӧ-влакын чемпионатышкыже мийыше-влак.
