УВЕР ЙОГЫН

Марий Эл гыч еш – кокымшо верыште

22 сентябрьыште Саранскыште «Юл кундемысе эн сай еш» конкурсым иктешленыт.

Конкурсыш округысо чыла регион гыч 14 еш ушнен. Икымше верыш Саратов область гыч Рудневмыт еш лектын. Мемнан республикын чапшым аралыше Петровмыт еш кокымшо степенян диплом дене палемдалтын. Кумшо степенян дипломым Чуваш Республик гыч Львовмыт ешлан кучыктеныт.

Курыкмарий районысо Картук села гыч Петровмыт еш нерген уэш ушештарен кодаш гын, нуно пырля 25 ий илат да «ший» сӱаныштымат палемденыт. Борис Васильевич ден  Тамара Викентьевна кок ӱдырым ончен куштеныт. Кызыт уныкаштат куандарат. Кугу ешышт дене нуно курыкмарий калык мурым погат да йоҥгалтарат. Тыгак курыкмарий костюмым коллекционироватлат, шкештат ямдылат, семӱзгар-влак дене, поснак гармонь да кӱсле дене, шоктат. Чыла тиде пашашке 85 ияш ача-кочашт Викентий Иванович Прокопьев да тукым шольышт Евгений Милютин кумылын ушнат. Тидын дене пырля ты еш эстраде да калык мурым мураш, тыгак куштымашым ончыкташ йӧрата. Спорт дене пеҥгыде кылым кучат, чылан пырля тӱрлӧ вере миен толыт, кидпашаланат уста улыт.

Л.Камалетдинова.

Опубликовать в Одноклассники

Добавить комментарий