УВЕР ЙОГЫН

Кыргызстаныште кочевник-влакын кумшо тӱнямбал модмашышт эртен

Сентябрь тӱҥалтыште Кыргызстаныште кочевник-влакын кумшо тӱнямбал модмашышт эртен. 

Модмашын талисманжылан барс шотлалтеш а лозунгшо тыге йоҥген: «Едины силой! Едины духом!». Тудым эртараш манын, Иссык-Куль курык ер  воктене лӱмын кочевник-влакын этноолаштым ыштеныт. Спорт таҥасымашлаште участвоватлыме дене пырля «Кочевник-влакын сандалыкышт» фестивальыште ик вер гыч весыш кусныл илыше калык-влакын тӱвырашт да илышышт денат палыме лияш йӧн лийын.

 Модмашын программышкыже спортын 37 видше пурталтын. Чылаже 74 эл гыч 1976 спортсмен участвоватлен. Нунын коклаште Параньга район гыч татар- башкир кучедалмаш дене тӱнян чемпионжо Муса Галлямоват лийын. Чаманен каласыман, «курэш» таҥасымаш радамыште лийын огыл. Но Муса шкаланже вес видым — «алышым» — ойырен налын. Тиде — кыдалыш кылдыме ӱштӧ дене кучедалмаш. Мо шонеда, 100 килограмм марте нелытан-влакын категорийыштышт тудо шӧртнӧ медальым сеҥен налын кертын. Финалыште  Аргентине гыч Лусиано Дел Риом сеҥен.

 Каласен кодыман: ты модмаште Россий гыч мийыше-влак 17 шӧртньӧ, 12 ший, 27 бронзо медальым сеҥен налыныт.

 С.Носова

Снимкыште: М.Галлямов финал годым.

Опубликовать в Одноклассники

Добавить комментарий