КУЛЬТУР ДА ИСКУССТВО СЫМЫКТЫШ

Мемнан унана: Калык куштымаш утларак келша

Лаштыкнан тачысе унаже  — Йошкар-Олаште шочын-кушшо, «Марий Эл» кугыжаныш куштышо ансамбльын солистше Андрей Николаев. 

Коллективыште тудо 2002 ий годсек пашам ышта. Андрей ятыр куштымашыште сольный партийым кушта. 

Тыгай корным ойырен налаш тудлан кӧ темлен? Шкем эреак формышто кучаш манын, мом ышта? Тиде да моло йодышлан шкеже вашешта.

— «Марий Эл» ансамбльыш кузе логалынат?

— Палантай лӱмеш тӱвыра да сымыктыш колледжыште кокымшо курсышто тунемме годым Славик Михайлович Асмаев мемнан отделений гыч икмыняр рвезым «Марий Эл» ансамбльыш кушташ ӱжын. Нунын коклаште мыят лийынам. Мутат уке, тидлан куаненам. Коллектив самырык-шамычым сайын вашлийын. Икымше гана «Луй модеш» куштымаш дене ты коллектив дене сценыш лектынам. Тиддеч вара пашам ышташ тӱҥалынам да тунемашат коштынам. Утыждене неле лийын манын ом керт. А кызыт чыла гаяк куштымаште: «Курыкмарий модыш», «Теҥгылыште», «Тарантелла», «Весела кем ургызо», «Емелья» да молат — улам.

Колледж деч вара салтак радамыш ушненат. Армий гыч пӧртылмеке, ансамбльыш толмет шуын?

— Армийыште 2006 гыч 2008 ий марте службым эртенам. Тушеч пӧртылмеке, пел ий каненам,  а вара чонем садак куштымашке ӱжын. Пашаште чылажат лиеда, сандене чонлан лишыл сомыл дене кеч-могай нелылык гычат лекташ лиеш.

Колледжым «балетын артистше» специальность дене тунем пытаренат. Театрыш пашам ышташ каяш шонен отыл?

— Уке. Мылам тӱрлӧ калыкын куштымашыже-влак утларак келшат.

— Коллектив дене тӱрлӧ кундемыш гастроль дене лектын коштыда. Икымше гана куш миенат?

— Икымше гана 2009 ийыште Испанийыш миенам. Тунам гастрольна кок тылзат пеле шуйнен. Пашамат ыштенна, каненат улына. Теҥызыште веле огыл, океаныште йӱштылмӧ поснак чот келшен. Жапым веселан эртарымым кызытат порын шарналтем. Тиддеч посна Российын турлӧ олаштыже: Ростовышто, Ульяновскышто, Санкт-Петербургышто… — лийынам.  

Ик жап «Марий памаш» ансамбльышкат коштынат. Кок коллективыште кушташ куштылгыжак огыл, шонем.

— Армий деч вара икмыняр жап эртымеке, Мария Лазаревна Соловьёва мыйым «Марий памаш» ансамбльыш кушташ ӱжын. Сандене иктаж кок ий кок коллективыш коштынам. А Мария Лазаревна мыйым шым ияш гычак Йошкар-Оласе 18-ше номеран школышто тиде мастарлыклан туныктен. Тунам «Шонанпыл» ансамбльыш коштынам, эсогыл гастроль дене йот мландыш, Финляндийыш, миен толынна. 

— Ешан лиймеке, очыни, иктыжым ойырен налаш кӱлын.

— Чын, вет ешан лиймеке, пелашлан, вараракше икшывылан жапым шукырак ойырыман. Тыге веле ешыште умылымаш, йӧратымаш лиеш. А тиде ешыште эн кӱлешан.

Ешыш оксам пӧръеҥ кондышаш, маныт. Мурен-куштен гына илыш ончыко ок кай манын, пелашет иктаж гана шылтален ойлен огыл?

— Уке, тудлан мыйын пашам келша.

— Шкендым формышто кучаш манын, мом ыштет але мом от ыште?

— Тынар ий ансамбльыште куштымеке, кап-кылым шуарыме шотышто ом ойгыро. Мыланна пашаште репетицият сита. Кызыт нелытым изиш погенна гынат, тургым тӱҥалмеке, вашке «йомеш» (воштылеш). Лӱмын спортзалышкат ом кошт, кочмо шотыштат нимом ом кычалтыл.

Йошкар-Олаште шочын-кушкынат гынат, марла мутланет…

— Изи годым кеҥеж канышлан кочам-ковам деке Медведево районысо Яшмак ялыш кошташ йӧратенам. Школыштат марий йылмым тунемме. Сандене чылт яндарын марла мутланен ом мошто гынат, нимынярат ом вожыл.

Алевтина Байкова мутланен.

(Фотом А.Николаевын еш альбомжо гыч налме.)

Опубликовать в Одноклассники

Добавить комментарий