Вашке маскан вынемыш вочмо жапше шуэш. Санденак тудым шотлымо пашам кеҥежым эртарат. Марий Элын Пӱртӱс поянлык, экологий да йырым- йырысе средам аралыме министерствыжын специалистше-влак верлаште кугыжаныш инспектор, тыгак сонарзе-влакын полшымышт дене тудын чотшым рашемденыт.
Вигак палемдыман: маска шукемын. Мутлан, 2016 ийыште 887, 2017 ийыште 900 лийын гын, тений тудын чотшо 921 погынен. Поснак шуко маска Килемар районышто уло. Тыгак Звенигово, Медведево, Морко, Юрино районлаште вашлиялтыт.
А теве сурок-байбакын чотшо иземын толеш. Тӱҥ шотышто нуно Курыкмарий районысо «Емешевский» кугыжаныш заказникыште да воктенысе кумдыкышто илат. Мутлан, 2016 ийыште 509, 2017 ийыште 542 лийын гын, тенийлан 327 гына кодын. Специалист-влакын палемдымышт почеш, тидлан амалым кӱтӱм коштыкташ келыштарыме кумдыкым иземдымат полшен, эшежым нуно шӱкшудо дене кушкын шогалыныт. А сурок-шамычет шкаланашт лач тушто пыжашым ыштат улмаш. Тыгак заказникыште рывыж чот шукемын, нунат суроклан тӱланаш мешаят. Санденак тений сонарлыме пагытыште рывыж чотым тушто иземдаш палемдыме.
С.Носова.
