Изарнян, 20 сентябрьыште, Марий Эл Республикын кудымшо созыв Кугыжаныш Погынжын 39-ше сессийже эртыш.
Сессийыште палемдыме 23 йодыш олмеш иктылан шукырак ончышт.
Икымше йодышак моткоч кӱлешан ыле – депутат-влак «Марий Эл Республикыште посна категорий граждан-влаклан социальный полышым пуымо да нуным социально обслуживатлыме нерген» Марий Эл Республикын Законжын 6-шо статьяшкыже вашталтышым пуртышт. Тудын дене келшышын, пашан ветеранже ден нунын дене тӧр шотлалтше еҥ-влаклан, ӱдырамаш-шамычын 55 ийым, пӧръеҥ-шамычын 60 ийым темымекышт, тӱрлӧ социальный полыш мере лиеш.
Депутат-влак «Марий Эл Республикыште административный правонарушений нерген» законышкат вашталтышым пуртышт. Тиде республикын Антитеррористический комиссийжын пашаже дене кылдалтын. Тудын решенийжым илышыш пуртыдымылан ынде штрафым тӱлаш тӱҥалыт: еҥ-влак 1 гыч 3 тӱжем теҥге марте; должностной лица-влак – 10 гыч 30 тӱжем теҥге марте; организаций-влак – 50 гыч 150 тӱжем теҥге марте.
«Марий Эл Республикыште бюджетный правоотношений нерген» законыш тӧрлатымашым пуртышаш верчат йӱклышт. Корно движений лӱдыкшыдымылык нерген законым кӧ пудырта, нунат штрафым тӱлат, да тиде окса ончыкыжым республикын корно фондшым ешараш полша.
Сессийыште верысе самоуправленийын пашаже, нормативный правовой акт-влак, кугыжаныш награде, ялозанлыклан кучылталтшаш мланде, республикыште промышленный политикым вияҥдыме, физкультур, спорт шотышто да икмыняр закон ден пунчалыш вашталтышым пуртышт.
Тиде сессийыштак Марий Эл Республикын Кугыжаныш шотлышо палатыжын аудиторжым да Марий Эл Республикын Конституционный судын судьяжым шогалтышт. Кугыжаныш Погынын 39-ше сессийжын пашашкыже Марий Эл вуйлатыше Александр Евстифеев ушнен ыле. Тудак депутат-влаклан кок кандидатурым темлыш: аудиторлан – Сергей Красновым, судьялан – Юрий Ворончихиным. Регион вуйлатыше палемдыш: коктынат законын чыла йодмашыжлан келшен толыт. Кажныжын кушто да кӧлан пашам ыштымыж, могай кӱкшытыш шумыж дене кӱчыкын палдарыш.
Депутат-влак кок кандидатурыжымат поддержатлышт. Иктыж верч вигак йӱклышт гын, весыжым – закон дене келшышын тайнын.
Шернур да Медведево судебный район-влакын судебный участкыштын мировой судьяштым шогалтышт. Ынде тиде пашам Татьяна Волкова ден Валерий Павлов шукташ тӱҥалыт.=
Тылеч посна республиканский парламент пелен журналист-влакым аккредитоватлыме правилыш да у депутат-влакым сайлыме дене Кугыжаныш Погынын комитетше-влакын составышкыже вашталтышым ыштыме нерген йодыш-влакымат ончышт.
Любовь Камалетдинова.
