УВЕР ЙОГЫН

Марий Элыште кугорным уэмдат веле огыл, лопкаҥдат

Марий Эл Республик вуйлатыше Александр Евстифеев Советский районысо Вечын-Ӧрша-Кӧрдемтӱр корным уэмден олмыктымо паша дене палыме лийын. 

 Тудым эше 1979 ийыштак верысе ялозанлык предприятий-влакын вийышт дене ыштеныт улмаш. Тымарте тушто нимогай олмыктымо паша эртаралтын огыл. Кодшо ийын сентябрьыште Советский районышто илыше-влак тудым олымыктымо шотышто йодмаш дене тунам эше республик вуйлатышын пашажым жаплан шуктышо Александр Евстифеев деке лектыныт. Санденак регион вуйлатыше ты йодышым шке контрольышкыжо налын. 4,5 километр кужытан корным уэмден олмыктымо паша тений майыште тӱҥалын. Кум ий жапыште тудым кум йыжын дене шукташ палемдыме. Кажне йыжыҥлан раш датым палемдыме. Чыла пашам 2020 ий 30 октябрьыште мучашлышаш улыт.

 Тидлан республикын бюджетше гыч 270 миллион теҥгем ойырат. Тенийлан 71 миллион теҥге палемдалтын.

 Пашам «Марий Эл Дорстрой» ОАО-н Советский филиалже шукта. Кызытеш ямдылалтме пашам шуктымо, ӧрдыж гыч кудал эрташ корным келыштарыме, газ пучым, связь, электропередаче линий-влакым вес семын колтымо.  Кок тӱжем метр кужытышто мландым шупшыктен трамбоватлыме, вӱд йогышашлык кум пучым келыштарыме. Ошмам опташ тӱҥалыныт. Тидын нерген корным нӧлтышо-влак регион вуйлатышым палдареныт.

Подрядчикын ойлымыж почеш, пашам мучашлымеке, автокорнын категорийжат весе лийшаш. Тудын лопкытшо 7 метр марте кугемеш.

Александр Евстифеев строитель-влак деч тений корным асфальтироватлен шуктымо да тидын годым могай материалым кучылтмо шотышто рашемдаш  тыршен. Но нуно икымше йыжыҥыште тыгай паша ок шукталт манын увертареныт. А корнылан Роҥгысо карьер гыч шупшыктымо тыгыде кӱм кучылташ шонат, молан манаш гын тушто М800 чоткыдылык маркан известка кӱм аралыше лончо-влакым верештыныт.

 Регион вуйлатыше Медведево районысо Кузнецово села воктенысе корным ыштыме паша денат палыме лийын. Марий Элын транспорт да корно озанлык министрже Александр Сальников тудым палдарен. Йошкар-Ола-Уржум кугорнын тиде участкыже расчет параметр деч кок пачаш утларакат кучылталтеш. Суткаште 14 тӱжем автомобиль кудалыштеш. Таклан огыл тыште пытартыш шым ий жапыште 65 корно-транспорт происшествий лийын. Тушто 18 еҥ колен, 92 еҥ сусырген. Санденак министрын темлымыж почеш, тыште кугорно ныл полосан лийшаш.

«Марийскавтодор» директор Анатолий Аверин Александр Евстифеевым   ты участкыште корным уэмден олмыктымо паша проект дене палдарен. Тудым эше 2006 ийыштак ямдыленыт улмаш, но илышыш пуртен шуктен огытыл. Тидын шотыштак Александр Евстифеев ты документацийым кызытсе жаплан келшышын уэмдаш да регион кокласе корнылам чоҥымо федеральный проектыш пурташ темлаш кӱштен.

 Корным чоҥымо пашам Марий Эл Республик вуйлатыше эреак контрольыштыжо куча, молан манаш гын тидыже Россий Президентын майыште лекше указше почеш приоритетныйлан шотлалтеш. Тудын дене келшышын, 2024 ийлан регионласе корнылан 50 процентше нормативный йодмашлан келшен толшаш улыт.  

 Марий Эл Республик вуйлатышын организаций да аналитике виктемжын уверже негызеш С.Носова ямдылен.

Опубликовать в Одноклассники

Добавить комментарий