Марий Эл вуйлатыше Александр Евстифеев Йошкар-Оласе йоча эмлымверлан Лелия Соколован лӱмжым пуышаш нерген республикысе правительствын кӱштымашыжым подписатлен.
Кӱштымаште палемдыме почеш, тиде пунчалым республикысе Тазалыкым аралыме министерствын коллегийже ден эмлымверын коллектившын тӱшка погынымашыже Лелия Ивановна Соколован регионышто здравоохраненийым вияҥдымашке кугу надырым пыштымыжым шотыш налын иквереш луктыныт.
Ушештарыме семын каласаш гын, Лелия Соколова 1938 ийыште Йошкар-Олаште шочын. Школ деч вара Озаҥ оласе медицинский институтыш тунемаш пурен. 1968 ийыште уэш Йошкар-Олашке пӧртылын да 1972 ий марте оласе йоча эмлымверыште пашам ыштен. 1981 ийыште Л.Соколовам ты больницын тӱҥ врачшылан шогалтеныт. Тудын вуйлатымыж почеш йоча поликлинике, шӧр кухньо, восстановительный эмлымаш отделений, оласе йоча больницын специализироватлыме отделенийже-влак почылтыныт.
Лелия Ивановна жаплан келшыше технологийым шыҥдарымылан, стационар службым кугемдымылан, больницын подразделенийлажым у аппаратур дене пойдарымылан, диагностике ден эмлымаште у да ойыртемалтше йӧн-влаклан эҥертымылан, икшыве-влаклан социальный да специальный полышым пуымылан, медицине кадрым ямдылымылан кугу тӱткышым ойырен.
Лелия Соколова «Россий Федерацийын сулло врачше» да «Марий Элын сулло врачше» чап лӱм, «Знак Почета» орден дене палемдалтын. 1998 ийыште тудлан «Йошкар-Олан почетан гражданинже» чап лӱмым пуымо. Тазалыкым аралыме отрасльыш кугу надырым пыштымыжлан, мер пашаште чолган тыршымыжлан 2006 ийыште тудын лӱмжӧ «Российын эн сай еҥже-влак» энциклопедийыш пурталтын.
Лелия Соколова ӱмаште 7 августышто илыш дене чеверласен.
Л.Камалетдинова.
