Паша гыч кайымемлан кок арнят шуэш, а мыланем пашадарым огыт тӱлӧ. Мом ыштыман?
Медведево район, Знаменский посёлко.
С.Никитин.
Медведево районысо прокурорын полышкалышыже Владимир Поляков вашешта:
— РФ Паша кодексын 140- ше статьяж дене келышышын, ойпидыш кӱрылтмеке, пашазын пашам пуышо деч налшаш оксаже паша гыч кайыме кечын тӱлалтшаш. Пашам ыштыме пытартыш кечын айдеме ыштен огыл гын, оксам вес кечынже тӱлышаш улыт.
Пашам пуышо тиде нормым пудырта гын, гражданин тудын шотышто законым пудыртымо нерген йодмаш дене Кугыжаныш паша инспекцийыш, але прокуратурын законым пудыртымаш лийме верысе органыш лектын кертеш. Тыгак шке гыч паша правжым пудыртымо шотышто вуйшиймаш дене судыш йодмаш дене лекташ лиеш.
С.Носова ямдылен.
