ТЕАТР

У тургым: Шкетан театрыште ятыр оҥай спектакль мемнам вуча

М.Шкетан лӱмеш Марий национальный драме театрыште кажне кечын паша шолеш. Актёр ден режиссёр-влак черетан тургымым почаш ямдылалтыт. 

Театрын 99-ше тургымжо премьерлан поян. Тидын нерген кодшо кушкыжмын эртыше пресс-конференцийыште театр вуйлатыше Эрик Юзыкайн, театрын художественный вуйлатышыже Василий Пектеев да тӱҥ режиссёржо Роман Алексеев каласкалышт.

У тургым 28 сентябрьыште «Вий-ар – ме» рок-опер дене почылтеш. Ты постановкым сценыш Карел национальный театрын художественный вуйлатышыже, драматург, режиссер Сергей Пронин луктын.

Тиддеч вара театр коллектив шке йолташыже-влаклан Сергей Чавайнын «Элнет» романже негызеш шындыме тыгаяк лӱман спектакльым ончаш темла. Постановко марий сылнымутлан негызым пыштыше Сергей Григорьевич Чавайнын шочмыжлан 130 ий теммылан пӧлеклалтеш. Тудын премьерже 6 октябрьыште лиеш. А 12 октябрьыште уэш у постановкым — «Кӧ кечым пӧртылта» (А.Островский) — ужын кертына.

А кызыт Роман Юрьевич артист-шамыч дене татар драматург Зульфат Хакимын пьесыж почеш шындыме «Ӱжында?» лӱман комедийым сценыш лукташ ямдыла, — палдарыш Василий Александрович. – Тиде жапыштак Анатолий Спиридоновын эпический сынан «Югорно» поэмыж почеш постановко лекшаш. Руш произведенийым Анатолий Мокеев марлаш кусарен. Постановко ойыртемалтше лийшаш. Тудым театрын веле огыл, республикын илышыштыжат кугу событийлан шотлаш лиеш. Художник-постановщик семын Владимир Степанович Королёв тырша.

Владимир Степанович костюмлан эскизым археологический кӱнчымаш негызеш ыштен, вет содержаний почеш постановкышто кокла курымысо марий калыкын илышыже ончыкталтеш, — палемдыш Роман Алексеев.

Жап шке йогынжо дене шижде эрта. Сандене Шкетан лӱмеш театрын коллективше У ий каныш жапыште икшыве-влакым куандарыме нергенат шона. Йоча-влак «Морозко» (Н.Коляда) ден «Новогодний переполох» (И.Венедиктова) йомак-влакым ужын кертыт. Изиш варарак «Нӧнчык патыр» йомак негызеш возымо мюзикл икшыве-влакым куандараш тӱҥалеш.

У ий деч варат театрын йолташыже-влакым ятыр у спектакль вуча: «Ревизор» (Н.Гоголь), «Кырла» (Йыван Кырлалан пӧлеклалтше), «Шӧртньӧ лудо» (Ю.Байгуза) да молат.

Молгунамсе семынак финн-угор театр-влакым иквереш ушышо «Майатул» фестиваль республикнан рӱдолаштыже лиеш. Тудо 14 гыч 18 ноябрь марте эрта. Йошкар-Олаш Мордовий, Удмуртий, Коми, Карелий республикла, Кудымкар ола гыч театр-влак толыт, эн сай спектакльыштым марий зрительлан ончаш темлат. Шкетан лӱмеш

марий драме театр «Тулар ден тулаче» ден «Вий-ар – ме» спектакль-влакым аклаш луктеш.

Фестиваль жапыште поэзий негызеш драматургический произведенийым возышо-влаклан усталык лабораторий лиеш. Тидлан финн йолташна-влак лӱмын грантым возеныт, нунак лабораторийын пашажым вӱдаш тӱҥалыт, — палемдыш Роман Юрьевич.

2019 ийыште ме Марий драме театрын 100 ияш лӱмгечыжым кумдан палемдаш тӱҥалына. Марий Эл Республикын правительствыжын, Тӱвыра, печать да калык-влакын пашашт шотышто министерствыжын полшымышт дене уна-влакым пошкудо республикла: Башкортостан, Татарстан, Чуваший гыч веле огыл, моло кундемла гычат вашлийына, — ончыкылык паша дене палдара Василий Александрович. – Толшаш ийын «Кугу гастроль-влак» проект полшымо дене мемнан деке икмыняр республик гыч коллегына-влак толшаш, а ме нунын деке кайышаш улына. Мутлан, 2019 ий май тылзыште Шкетан лӱмеш театрын сценыштыже Москва гыч Изи театрын артистше-влак модаш тӱҥалыт манын ӱшанена.

Икманаш, у тургымышто Марий театр лу наре у постановкым шке ончышыжо-влаклан ямдыла. Тушко марий веле огыл, вес калык гыч лекше-влакымат вучат, вет кажне спектакль синхронно рушла кусаралтеш. Адакшым ынде билет шотыштат тургыжланаш нимолан: тудым интернет гочат налаш йӧн уло. А кӧ арня ончыч билетлан кая – тудын акше 30 процентлан шулдырак лиеш.

А.Байкова.

В.Тумбаевын фотожо.

Опубликовать в Одноклассники

Добавить комментарий