УВЕР ЙОГЫН

Йошкар-Олаште колым кучымо дене черетан таҥасымаш эртен

2 сентябрьыште Брюгге Набережныйыште колым кучымо дене черетан таҥасымашке ятыр кумылан еҥ чумырген. Участник-влак колым Какшан эҥерыште эҥырвоштыр да фидерный йӧн дене кученыт. Ик кече ончыч тренировкыштат южышт 2 килограмм нелытан ловалым кученыт. 

Палемдыме верыш спортсмен-влак шым шагат эрдене толыныт. Кок шагат гыч таҥасымаш тӱҥалын. Тудо куд шагат шуйнен.

Участник-влакым тергыше С.Бабиковын палемдымыж почеш, мыле колым кучымым шотлен огытыл. Чыла спортсменже кӱлешан кужытым, писылыкым, вӱдпорсыным шотыш налын кертын огыл.

Судья-влак мыняр колым кучымым висеныт. Тыге 1212 г. дене кумшо верыш фидер мастар А.Рыбаков лектын. Кокымшо верым 1376 грамм дене пошкудо Озаҥ ола гыч Д.Бабинец налын. Таҥасымашын чемпионжо – эҥырвоштыр дене кучышо колызо В.Григорьев. Владислав 2214 грамм колым кучен.

Чылан тыршеныт, но тыгай шкешотан таҥасымаште нимомат ончылгоч палаш ок лий: я шуко кол логалеш, я почшо дене «лупшалеш».

Черетан вес таҥасымаш, «Ежовый карп-2018» фестиваль, шушаш шуматкечын лиеш.

Е.Эшкинина.

Опубликовать в Одноклассники

Добавить комментарий