1 сентябрьыште Марий Эл вуйлатыше А.Евстифеев Советский район Ӱшнур школыш миен коштын. Тудо йоча-влакым у тунемме ий тӱҥалме дене саламлен, увертара Марий Эл вуйлатышын организаций да аналитике виктемже.
Тений тиде школыш 235 йоча толын. А икымше йыҥгыр 22 ӱдыр-рвезылан йоҥген. Ӱшнур школ республикыштына ик эн тошто. Тений тудлан 146 ий темеш. 2004 ий гыч посна предметым келгын туныктышо национальный школлан шотлалтеш. А Советский районышто тений парт коклашке 2660 тунемше шинчын, тушеч икымше классыш 340 ӱдыр-рвезе толын.
Пайрем линейке тӱҥалме деч ончыч республик вуйлатыше школым ончен коштын. Тунемме верын директоржо В.Галкин школ кӱрылтде пашам ышта манын палемден. Школ пелен йочасад, тыгак вес район ден тора ял гыч тунемше икшыве-шамычлан 50 веран интернат уло. Тылеч посна Ӱшнур школ республикысе национальный школ-влаклан базовый семын шотлалтеш. Тушто «Авамланде» этнокультур рӱдер пашам ышта. Каласыман, тунемме верыште художественный керамикылан посна пӧлемым ойырымо.
Республик вуйлатыше Шинчымаш кече дене саламлымыж годым Ӱшнур школышто тунемаш чыла йӧным ыштыме манын каласен: «Тунемаш – куштылго паша огыл. Туныктымо йӧн вашталтеш. Кызыт ме национальный школышто улына, йылмым да моло предметымат туныктымо кӱкшытым волтыман огыл. Тунемаш неле гынат, кӱлешан сомыл, вет лач тидын деч пӱрымашдан могай лиймыже, могай профессийым ойырымыда кылдалтеш. Шонымашкыда шуаш тыршыман».
А.Евстифеев школ колективым тыршен пашам ыштымыжлан, самырык тукымлан шинчымашым пуымыжлан, патриот шӱлышан еҥым куштымыжлан тауштен, шкенжын тунемме пагытшымат шарналтен.
– Школышто тунемме жапем эн оҥай, поян лийын. Мый Кечывалвел Уралыште 1-ше №-ан школышто тунемынам. Тудо кундемыштына ик эн кугу школ лийын. Ик параллельыште вич класс дене ыле. Класслаште 36 йоча дене тунемыныт. Туныктышо-шамыч кугу опытан, шке пашаштым сайын палыше лийыныт. Тидак мылам тӱрлӧ пашаште шкем сайын ончыкташ йӧным пуэн. Кугыжаныш службыштат. Школем тачат порын шарналтем, – манын А.Евстифеев.
Л.ШАБДАРОВА.
Д.Речкинын фотожо.
