ЯЛ ИЛЫШ

Таче ялыште: Тургым жапыште канаш кӧ ярса?

Кеҥежын кажне кечыже веле огыл, кажне шагат ден минутшо шерге. Санденак республикысе озанлыклаште кызыт – тургым жап: пасулаште шурным погат, тудым коштат, южо культурым солат, ярсыше мландыш ӱдат… 

Пасу паша

Марий Турек районысо «Восход» колхозыштат шуматкечын тӱрлӧ вере тӱрлӧ технике пашам ыштыме йӱк шокта ыле. Кеч тиде озанлык вуйлатышын сомылжым шуктышо Марат Мухаметханов дене ме касвелеш веле вашлийын кертна.

«Восход» СПК-ан кызыт 5974 гектар мландыже уло. Кугурак кумдыкышкыжо пырчан культурым ӱдат: уржам, шыдаҥым, шожым, шӱльым,  пурсам, тыгак икияш да шукияш шудым. Уржа 550 гектар кумдыкым айла гын, шыдаҥ – 1174, шож – 640, шӱльӧ -200, пурса – 100 гектарым. Икияш шудым 450 гектарыште ӱдымӧ. 

Мом да мыняр ӱдымым лудын лекмеке, шкеат умылышда, очыни: тиде озанлыкыште пареҥгым огыт шынде. Йӧршын!

— Пытартыш гана иктаж коло наре ий ончыч шынденна. Тудым ончен кушташ пашам ятыр ыштыман, а парышыже моткоч шагал. Чынрак каласаш гын, мемнан изи лийын. Санденак шындаш кумыл йомын, — умылтарыш Марат Нурмухаметович.

Мийыме жаплан кокияш уржам шийын пытареныт да пурса пасушко кусненыт ыле. Тиде пашам иктаж пелыж наре кумдыкышто ыштеныт улмаш. Сандене мийымына вес кечыжлан, рушарнян, пытаренат шуктена дыр манын палемдыш вуйлатышын пашажым шуктышо.

— А вара шож, шӱльӧ пасулашке куснена. Пытартышлан шыдаҥым шияш тӱҥалына. Тудо эше сайын шуын огыл, — рашемдыш тудо.

Кумданрак — «Марий Эл» газетын
2018 ий 28 августышто лекше номерыштыже лудын кертыда.

Любовь Камалетдинова

Опубликовать в Одноклассники

Добавить комментарий