У Торъял районысо Тошто Торъял школ у тунемме ий вашеш икшыве-влаклан куан уверым ямдылен: ынде ӱдыр-рвезе-влак технический усталыкыштым тӱрлӧ у оборудованийлан поян инженерный лабораторийыште шуарен кертыт.
Тыгай йӧн педагог-влакын ямдылыме «Инженер лиям!» проект дене (вуйлатышыже Т.Торощина) «Лукойл» ПАО-н эртарыме социальный да тӱвыра проект-влак конкурсыш тений ушнымыж да «Самырык-влакын тӱҥалтышышт» номинацийыште сеҥымылан кӧра пуалтын.
Тиде сеҥымаш куштылгынжак толын манаш огеш лий. «Лукойл-Волганефтепродукт» ООО-н официальный сайтыштыже палемдыме почеш, тений конкурсыш Нижегородский, Владимир, Вологда, Ярославский областьла, Марий Эл, Мордовий, Чуваший республикла гыч 367 паша пурен.
Илышым саемдаш виктаралтше проект-влаклан «Лукойл» ий гыч ийыш полша. Тошто Торъял школ гына тудын эртарыме конкурсыштыжо тений кумшо гана грантым сеҥен налын. Икымше гана, 2014 ийыште, тиде окса дене икшыве-влаклан модмо пӧлемым ыштеныт да тӱрлӧ оборудований дене пойдареныт. А 2016 ийыште грант окса дене школ тоштерын историй залжым шотыш конденыт да «Уголки памяти Староторъяльской школы» верысе школ нерген икымше книгам савыктен луктыныт.
Л.Камалетдинова.
