Ечызе-влакат кеҥежым пайдалын эртараш тыршат. Мутлан, Йошкар-Олаште 10-12 еҥ дене (тренерышт Е.Рыбаков) кум гана сборышто лийыныт. Куяр трассыштат, «Корта» ече базыштат ямдылалтыныт.
Нунылан тений РМТ гыч лӱмынак автобусым ойыреныт, тиде техникумынак тӱшкагудыштыжо иленыт. Август кыдалне ече-роллер дене «Арена» манежыште контрольный тренировкым эртареныт, таҥасымаште вийыштым тергеныт. Таче кечылан республикыште тале ечызылан шотлалтше С.Егоров ден Д.Чекулаев Мордва Республикын сборный командыж дене пырля кок сборышто лийыныт.
Юбилейный гыч тренер С.Кугергин ден Кужэҥер гыч тренер В.Еменгулов шукерте огыл ныл рвезым Удмуртийыш намиеныт. 18 августышто тушто нуно кум стартыште вийыштым тергеныт. Юл кундем федерал округын таҥасымаштыже икымше кечын кроссышто Андрей Шестаков шӱдє утла участник гыч 5-ше, Алексей Сапаров 23-шо, Александр Шабалин 33-шо, Кирилл Прозоров кок шӱдє еҥ коклаште 11-ше лийыныт. Чыланат вич километрым куржыныт.
19 августышто ече-роллер дене лу километрыште вий-куатыштым тергеныт. Кечывал деч ончыч коньки йєн дене куржыныт гын, кечывал деч вара – классик йєн дене. Тыште А.Шабалин шке тӱшкаштыже эн сай результатым ончыктен: ончыч 11-ше, вара 9-ше верыш лектын.
Е.Эшкинина.
