Йошкар-Олаште у тунемме ий вашеш школ воктене лӱдыкшыдымылык мерым кугемденыт: нарынче тӱс дене чолгыжшо светодиодан светофорым, тачысе илышлан келшен толшо печым, корно знакым вераҥденыт, искусственный корно тӧрсырым ыштеныт, разметкым сӱретленыт. Тыге школ воктенысе йолешкылан вончымо 29 верже гыч 11-шым ГОСТ-лан келыштареныт, увертара Марий Эл вуйлатышын организаций ден аналитике виктемже.
Марий Эл вуйлатыше Александр Евстифеев икмыняр верыш инспекций дене коштын. Тудо ыштыме пашан качествыжым терген да Йошкар-Олан мэрже Е.Масловлан йолешкылан вончымо кодшо 18 верым у йодмаш дене келшышын шотыш кондаш йодын.
Рӱдолан мэрже тений школ воктене йолешкылан кошташ верым саемдыме нерген ойлен. Тидыже аварий лийын кертме лӱдыкшым иземдышаш. Чыла пашам «2013-2020 ийлаште корнышто кудалыштме лӱдыкшыдымылыкым кугемдымаш» федеральный целевой программе кышкарыште ыштыме. Ӱмаште оласе бюджетыште тидлан кок миллион теҥгем ойыреныт гын, тений 18 миллион теҥгем кучылтыныт, но паша але мучашлалтын огыл. Паша умбакыжат тыгак вияҥеш гын, школ воктенысе йолешкылан вончымо верым ГОСТ-лан келыштарен шуктат.
Евгений Маслов корнышто коштмо ден кудалыштме лӱдыкшыдымылык дене кылдалтше пашам муниципальный программе почеш ыштымымат палемден. Тидлан оласе бюджет гыч 10 миллион теҥгем ойыреныт.
Л.ШАБДАРОВА.
