УВЕР ЙОГЫН

Рӱдола: Йошкар-Олаште у квартал лиеш

Йошкар-Оласе Сеҥымаш бульварыште, «Дружба» стадион воктене, 10 ий жапыште  у кварталым чоҥат.  Тиде кумдыкым вияҥдыме нерген ойпидышым пеҥгыдемдыме шотышто почылтмо аукционым эртарыме нерген пунчалеш кидпалым Йошкар-Олан мэрже Евгений Маслов пыштен. 

У квартал Сеҥымаш бульвар, Ленин проспект, Рябинин, Машиностроитель уремла коклаште лиеш. Чоҥаш тӱҥалше-влаклан тиде кундемыште верланыше кок пачашан 16 тошто пӧртым рончаш, инфраструктурым ышташ логалеш. Тыге Рябинин уремысе 14-ше, 16-шо,18-ше, 20-шо, 22-шо, 24-ше №-ан пӧртлам, Сеҥымаш бульварысе 23-шо, 25-ше, 27-ше, 29-ше, 31-ше, 33-шо №-ан оралтылам, Заводской изуремысе 5-ше, 7-ше, 64-ше, 66-шо №-ан суртлам сӱмырат.

Контрактын тӱҥалтыш акше – 3, 2 миллион теҥге.  Йошкар-Ола мэрын пунчалже почеш, аукционым сеҥыше, контрактым пеҥгыдемдымеке, куд тылзыште тиде кумдыкым вашталтыме планировкын проектшым ямдылен шуктышаш да ончыктышаш. Шым ийыште застройщик-влак  рончымо пӧртласе пачерын озаже-шамычлан (социальный найм почеш муниципальный илемыште илышылан) оксам тӱлышаш, вес пачерым налын пуышаш але чоҥышаш улыт.

Л.ШАБДАРОВА.

Опубликовать в Одноклассники

Добавить комментарий