Ӱшанымылат огеш чуч, но тиде тыге манын палемдат. Пытартыш жапыште Российыште икымше гана пашадыме-влакын чотышт эн чот шагалемын. Ты шотышто Марий Эл, Карелий да эше икмыняр регион гына ойыртемалтыныт.
Российын паша да социальный аралымаш министрже Максим Топилинын мутшылан эҥертен, палдара Новости РИА. Министрын ойлымыж почеш, тений 15 августлан налмаште элыштына пашадымылан 684 тӱжемат 760 еҥ шотлалтын.
– 1991 ий гыч але марте тиде – историйыште эн изи кугыт, – каласен М.Топилин.
Министрын палемдымыж почеш, пашадыме-влакын чотышт иземме элын 60 регионыштыжо палдырна. Нунын радамышт шагалемме эн чот Марий Элыште, Чукотко ден Ненецк автономный округлаште, Туваште, Карелийыште, Магадан, Псков, Воронеж областьлаште, Камчатке ден Забайкальск крайлаште палдырна.
Л.Камалетдинова
