Т.Евсеев лӱмеш национальный тоштерын сециалистше-влак «Кугу Какшан» заповедник да Козьмодемьянскысе А.В.Григорьев лӱмеш художественно-исторический тоштер дене пырля Курыкмарий районысо Юл серыш шымлышаш материалым погымо дене кылдалтше экспедицийым эртареныт.
Тӱҥ шотышто нуно Козьмодемьянск ола воктенысе Юл эҥерын пурла сержым шымленыт, фотофиксацийым эртареныт. Вӱд дене мушкылт шинчымылан кӧра серже эркын шаланен толеш. Тыгак национальный тоштерын этномологический коллекцийыжылан тупрӱдыдымӧ янлык ден насекомый, кушкыл, вӱдыштӧ илыше чонан-влак дене кылдалтше материалым погеныт. Нуно Козьмодемьянскыште, Троицкий Посад, Сумки селалаште, Актусола ялыште лийыныт. Мом вара тыгай ӧрыктарышыжым нуно верештыныт? Мутлан, Марий Элыште пеш шуэн вашлиялтше кушкыллан шотлалтше Ола нер кундемыште (Чертово городище) Браунын многрядникшым, лунникым муыныт, фотом ыштеныт. Республикысе фаунышто тыгак шуэн вашлиялтше таливарашым (пустельга), шем курныжым, сур турням, изи коллоецым (зимородокым), шӧртнялге шуркым верештыныт.
Мутат уке, тоштер пашаеҥ-влаклан тыште верысе-шамычат, ученый эколог-влакат чотак полшеныт. Сандене нуно Козьмодемьянскысе художественно-исторический тоштерын пашаеҥже-влак Владимир Шерстневлан, Мария Юртуковалан, «Кугу Какшан» заповедник гыч научный пашаеҥ Геннадий Богдановлан тауштат.
С.Носова
Фотом национальный тошерын фондшо гыч налме.
