УВЕР ЙОГЫН

Звенигово районысо полиций отдел вуйлатышым суд ончылно кокымшо гана мут кучаш шогалтат

Осал пашам ыштымыжлан Звенигово районысо полиций отдел вуйлатышым суд ончылно кокымшо гана мут кучаш шогалтат. 

Икымше ганаже тудо Йӱдвед Кавказ регионыш командировкыш каяш кумылан подчиненныйжо деч, тыгак пашаеҥ-влакым ик отдел гыч весыш кусарымым «каҥашымылан» да дисциплиным пудыртымылан лушкыдырак наказанийым пуышашлан нунын деч взяткым налмылан титаклалтын. Тыгай преступленийым ыштымыжлан тунам идалыкат пеле жаплан тӱшка режиман колонийыш вераҥдаш пунчалым луктыныт. Сандене ончычсо полиций отдел вуйлатыше кызыт петырымаште шинча, палдара РФ Следствий комитетын Марий Элысе Следствий управленийжын пресс-службыжо.

Туге гынат, судитлыме тиде вуйлатыше шотышто, манмыла, историй мучашлалтын огыл.  Тудын эше вес титакшымат тӱжваке луктыныт. Кокымшо уголовный дела дене келшышын, 38 ияш вуйлатыше подчиненныйжо-влак деч оксам поген налмылан титаклалтеш. 2016 ийысе паша лектышым иктешлымеке, декабрьыште икмыняр еҥым премий дене палемдаш оксам ойырымо нерген пален налын да ныл пашаеҥлан кугурак кугытым  пуышаш нерген приказым подписатлен. Тылеч вара алмаштышыже-влак гоч тиде оксашт гыч ужашыжым шканже поген налын. Тыге кугыжанышлан 105 тӱжем теҥгеаш эҥгекым ыштен.

Кызыт делам судыш пуэныт.

Л.Камалетдинова.

Опубликовать в Одноклассники

Добавить комментарий