Звенигово районышто «Емельян Пугачевын кышаж почеш» ялысе турист маршрутым почыныт.
Эше кодшо ийын Звениговысо межпоселенческий лудмыверын пашаеҥже-влак тиде маршрутым ыштыме шотышто проектым ямдыленыт. Проект «Культурная мозаика малых городов и сел» всероссийский конкурсын грантшым сеҥен налын. Теве ынде Елена ден Геннадий Тимченкомытын благотворительный фондыштын, тыгак республикысе Самырык-влакын пашашт, спорт да туризм министерствын полшымышт дене тудо илышыш шыҥдаралтын.
Ялысе турист йолгорно Емельян Пугачев дене кылдалтше исторический верла дене палдара, тудо тошто озаҥ тракт дене эрта. Тракт ожно Царевококшайск ден Озаҥ олам ушен. Южо вере тачат палдырна. Маршрутышто поснак чапланыше объект-шамычат улыт, тиде — Ваштар курык, «Ужар памаш», Пугачевын тумыжо. Емельян пугачевын Марий кундемыште шке войскаж дене эртымыж нерген ятыр преданий уло. Иктыж почеш, Озаҥ воктене сеҥалтмекыже, 1774 ийыште тудо Марий кундем велке чакнен толын. Каналташ Ваштар курыкысо кугу тумо воктеке шогалын улмаш. А тудын вуйжо гыч Озан оламат эскераш лийын.
Теве ынде историй дене палдарыше маршрутыш турист-шамычат толаш тӱҥалыт.
С.Носова
