«МАРИЙ ЭЛ» ТАЧЕ

Лудшо да газет: «Марий Эл» газет кушан йомеш?

Республикысе почто-влак подпискылан оксам погат, а газет ден журналым лудшо-шамычлан чылаж годымак намиен огыт шукто. Мый «Марий Эл» газетым Сомбатхейысе 38-ше номеран почто гоч налам. Южгунам налам, а южгунам уке. Тиде томаша кумшо ий шуйна, тынар жапак мый почтовик-влак дене «воеватлем», но нигузе нуным сеҥен керташ ок лий. Мутлан, 2017 ийысе пытартыш номерым (30 декабрь годсым) ышт кондо. А тушто У ий пайрем кече-влак тӱҥальыч, нигє дене вашлияш, нигє дене кутыраш йєн ыш лий. 4 январьыште почтын омсаже содыки почылто, мый газет шумлык пурышым. Почто отделенийын зданийжым олмыктат ыле, сандене шеҥгечын, кудывече гыч, пурен коштыныт. Тошкал- тыш кӱкшӱ, кучем уке, лӱдын-лӱдын кӱзет да волет. Адакшым тошкалтышыжым эрыктен огытыл, яклештын камвозат гын, мучко пєрдын волет да сусыргет. Шоҥго-влаклан тушко каяш моткоч лӱдыкшє ыле… Мый, шыдем лектынат, нимом ончыде кӱзен кайышым. Шыгыр пєлемыште кок ӱдырамаш пашам ышта. Еҥ-влак шукыжым посылкылан толедат, а мый газет шотышто умылкалаш пижым:

– Шукерте огыл веле газет ден журнал-влакым почтальонко наҥгайыш, тылат намиен пуа, – мане самырык ош ӱдырамаш.

– Лекме кечын газет ок тол гын, тудым вучаш арам!

– Почтальонко намийышаш! Пєртылеш гын, мый йодам!

Тыге ӱшандарен колтышт мыйым.

Мєҥгє тольымат, почто яшлыкым почын ончальым. Уке газет! Икмыняр кече гыч почтальонкым вашлийым.

– Мылам «Марий Эл» газет ок тол.

– Тыйын газетет мылам ок кӱл! – руал пуыш илалше ӱдырамаш, наверне, пенсионер.

– А кєлан кӱлеш?

Тудет мутшым вес могырыш лупшале, почтышто умылкалаш сєрыш. Сӱрет сай могырыш вашталтеш, шонышым. Но арам улмаш, 30 декабрьыште лекше «Марий Эл» тачат уке. Тылеч ончыч йомшо газет-влак нергенже омат ойло.

Газет эре годым ок тол гынат, мый тенийысе пелийлан подпискым ӱшан дене ыштышым. Икымше номерым яшлыкыш конден пыштеныт, но вара адакат ӱшан теле тӱтыра гай шулен йомо. Кокымшо номер, 16 январьыште лекше «Марий Эл», ыш тол. Йыҥгыртен толашышым, киямат, телефон дек нигє ыш мий. Вес гана йыҥгыртышым. Тиде ганалан ала-кє телефон кнопкым темдал йєртыш. Почтыш кастене уныкам колтышым, мылам кӱкшє да шӱкшє тошкалтыш дене кӱзаш неле, вуй савырна, тудо самырык-влаклан веле. Паледа, уныкалан мом каласен колтеныт?

– У ий пайрем деч вара газет лектын огыл, кунам лектеш гын, ме вик намиена.

А тиде 16 январьыште лийын. Теве кузе чояланат, шоякым «нӱжыт», чи- сте фантазёр улыт! Мыйын шонымаште, почто отделенийыш газет толын шуэш гын, тудым адресат дек намиен шуктат. Но газетше кушан йомеш? Очыни, почтамтыште ышты- ше-влак шке сомылыштым айда-лийже шуктат. Тыгай шонымашат шочеш: ала марий газетым огыт пагале, шєрын ончат? Мутлан, «Семейная газета», кӱрылтде толешыс.

Мый 2018 ийын кокымшо пелыжланат подпискым ыштышым. Кок арня чоло «Марий Эл» газетым кӱрылтде конден шогышт, а вара адакат «чехарда» тӱҥале. Зданийым олмыктымеке, почто пашаеҥ-влакат вашталтыч, тошто начальникым почтамтыш нальыч. У пашаеҥ-влакым погеныт гынат, сӱрет ок вашталт. Июльышто кум номер «йомо». Уке, почто яшлык гыч огыл, а почтальон ок кондо, векат, почтамт ок колто. Туге гынат почто пашаеҥ-влак огыт тургыжлане, миет гын веле начальник тарванылаш тӱҥалеш. Ик кечын тудын дене вашлиймем годым каласыш:

– Мый отпускыш каем, олмешем весе кодеш.

Мый весыж декат пурышым. Лачак кугарня, газет лекме кече, ыле.

– Таче адакат газетым конден огытыл! – ойлем.

А тудет:

– Почтальонко нимом каласен огылыс! Кычалаш тӱҥалам.

Телефон номерым возен кодыш, но йыҥгыртыше уке.

Рӱдє почтамт пашам начарын ышта гын, газетым выписатлаш кумылжат ок лек. Мый ужынам, почтальонын сумкаштыже ик-кок газет веле, савыктыме изданийымат калык ок нал, почто пашаеҥ-влакын ответственностьышт уке. Чумыр налмаште, Йошкар-Олаште илыше-шамыч кокла гыч пеш шагалынже газет ден жур- наллан подпискым ыштат, тидым почто пашаеҥ-влак огыт шиж, шотышкат огыт нал, шке подпискым ышташ ӱжыт.

Анатолий Новиков, подписчик.
Йошкар-Ола.

Йошкар-Олаште илыше да газетнан йолташыже А.Новиковын серышыжлан Марий Эл Республикын федерал почто службо управле- нийжын «Россий почто» филиалжын подписке отделжым вуйлатыше И.Гарбар тыге вашештен:

-Чынжымак, савыктышым адресатлан жапыштыже намиен шуктымо шотышто ситыдымаш уло. Тидыже теве мо дене кылдалтын. Почто связь отделений еда подписной изданийым адрес дене келшышын ойыркалыше пашаеҥ-влак чӱчкыдын вашталтыт: икте толеш, весе кая. У паша- еҥ-влак савыктыш-шамычын индексыштым чӱчкыдынак путаят. Кызыт тидын шотышто тунеммашым, тыгак погынымашым эртарена.

Серышым возышо А.Новиковлан «Марий Эл» газетым таче (тиде вашмутым 26 июльышто пуымо – авт.) кече марте чыла номерым намиен шуктымо. Тидым 38-ше №-ан почто отделенийым вуйлатыше С.Москвина шкеак ыштен. Подпискым ыштышын претензийже уке.

Г.КОЖЕВНИКОВА.

Опубликовать в Одноклассники

Добавить комментарий