Сылне ужар олыкан пӱртӱс лоҥгаште Морко кундемын лӱмлӧ эргыже, «Передовик» ялозанлык артельын ончычсо вуйлатышыже, Марий Эл Кугыжаныш Погынын ончычсо депутатше, Марий Эл ялозанлыкын сулло пашаеҥже, Марий Эл Кугыжаныш премийын лауреатше Геннадий Савельевич Григорьев шочмыжлан 65 ияш лӱмгечыжым палемден.
Тудым саламлаш пайремышкыже эн лишыл йолташыже-влак погыненыт. Нунын коклаште изиж годсек шочмо ялыштыже пырля кушмо йолташыже, спортсмен, музыкант, мураш, кушташ йӧратыше тале йолташыже-влак лийыныт. Тыгак лӱм- лӧ пайремышкыже Геннадий Саве- льевич Йошкар-Ола гыч шкенжын Морко кундемыште шочын-кушшо лишыл землякше-влакымат – Уилем ялын эргыже, М.Шкетан лӱмеш Марий национальный драме теат- рын художественный вуйлатышыже В.Пектеевым, ГТРК Марий радион вуйлатышыже, Марий Элын сулло журналистше В.Кольцовым, Нуръял Корамасын эргыже, историй науко кандидат О.Тихоновым, Унчо ялын тале шочшыжо, кумдан палыме предприниматель-влак Б.Ивановым, Е.Петровым – пагален ӱжын. Тыгак Пошкырт кундемын шочшыжо-влакат Шавеличым уло кумылын юбилейже дене саламлаш миенна. Тиде «Марий Эл» газетын тӱҥ редакторжо, Россий Федераций культурын сулло пашаеҥже А.Абдулов да мый.
Мылам тудын пайремышкыже мияш поснак кугу куан ыле, вет ме Геннадий Савельевич дене пырля эше 2000-2001 ийлаште Венгрийыште «Марий сурт-пече» музей-комплексым чоҥенна.
Йошкар-Ола гыч Унчышко Б.Ивано- вын микроавтобусшо дене кудалме годым корнышто тӱрлӧ нерген мут- ланенна, шижынат огынал – «Морко кундем» манын возымо чекышке ми- енат шуынна. Уремыш лектын, морко мландын яндар южшо дене куанен шӱлалтен, адак ончыко кудалынна. Унчо села койылалтен. Эн ончычак ме корно воктене Онар патырлан шогал- тыме кӱ воктене чарнен шогалынна, сай тыланымаш дене воктекыже кӱ падырашым пыштенна.
Варажым Шора эҥер воктенысе олыкыш воленна, а тушто – автомашинаже! Моткоч шуко. Лишкырак миен шумек, тамле шикш пуш нерыш вик пернен. Тулото ӱмбалне кок кугу подым вераҥдыме: иктыштыже – под тич шыл, а весыштыже кол шӱр шолын.
Пайремын озаже мемнам порын вашлийын, кажнынам ӧндалын, кид- нам кучен. Олыкышто пӱртӱс моткоч ямле, кайык-влак муреныт, лыве-ша- мыч чоҥештылыныт. Кечыжат, юби- лярым пагалышыла, кава гыч мот- коч шокшо южшым мланде ӱмбаке шарен. Садлан капкылым кандараш манын, иктышт эҥерыш йӱштылаш каеныт, весышт сер воктене чоҥен шогалтыме чапле купельысе памаш вӱдыштӧ йӱштылыныт.
Кенета чодыра воктенсе чоҥгаташте марий пӧръеҥ-влак, рӱж погынен, кок музикан (гармонь) почеш шергылтарен мурен, тора гычак Геннадий Савельевичым саламленыт. Уна-влак погынен шумек, лӱмын ойырымо тамада Шавеличын юбилейжы- лан пӧлеклалтше пайремым почын. А уна-влак юбилярлан сай тазалыкым, ончыкылык поро илышым, кужу рыскалан (пиалан) ӱмырым тыланен, поро пашажлан моктен, кугешнен, кажныже шокшын саламленыт – кӧжӧ гармонь сем почеш муралтен але по- челамутым лудын, кӧжӧ вик пӧлекым кучыктен. Санян Вачи (Пектеев) шке гармоньжым шоктен, сылне мурыжо-влак дене куандарен.
Мый ӧрын онченам – Унчо села пӧръеҥ-влак чылан гаяк гармоньым шоктен моштат, чаплын мурат, талын куштат, весела улыт! Шке кок- лаштышт пеш сай келшымаш, икте-весым пагалымаш шижалтын.
Пагалыме Геннадий Савельевич! Юбилей пайремет дене саламлем. Ончыкыжат эре пагалыме, шерге, лишыл йолташ, данле марий айдеме лийын код. Марий калык тендан дене кугешна!
М.МАТУКОВА,
Э.Сапаев лӱмеш опер да балет театр тоштерын вуйлатышыже.
