ОБРАЗОВАНИЙ

Йошкар-Оласе ик школышто аутизм черан йоча-влаклан классым ышташ шонат

Йошкар-Оласе ик школышто аутизм черан йоча-влаклан классым ышташ шонат. Тидын нерген Калык фронтын Марий Элысе пӧлкажын эксперт заседанийыштыже кутыреныт. Тыгай классым почмо нерген йодмаш дене ача-ава-влак ОНФ-ыш лектыныт. Палемдыман, тазалык шотышто ойыртемалтше икшывын образованийже дене кылдалтше йодышым тений шошым Марий Эл правительствыште нӧлталыныт. Ача-ава-шамычлан тыгай классым почаш 14-ше №-ан гимназийыште темленыт, молан манаш гын тиде тунемме верыш тазалык шотышто ойыртемалтше ныл икшыве коштеш, эше нылытын тиде кундемыштак илат. 

Но таче кече марте ача-ава-шамыч инвалид йоча-влак могай школышто тунемаш тӱҥалыт манын, кызытат огыт пале. «Ойыртемалтше еш» регионысо мер организаций нунылан пӧлшаш сӧрен. Тыге «Ресурс класс» проект илышыш шыҥдаралташ тӱҥалеш. Тудлан РФ Президентын грантшын фондшо гыч окса ойыралтын. Проект почеш, инвалид йоча ден нунын ача-авашт специалистын полышышжлан эҥертен кертыт. Тылеч посна аутизм черан икшыве-влак социумышко пураш полшышо мероприятийлаш кошташ тӱҥалыт. А ресурс класс почылтмеке, регионыштына аутизм черан икшывым туныктышо ресурс рӱдерым ыштат.

«Фронтовик-влак», Марий Элын Образований да науко минстерствыжын, Йошкар-Ола образований управленийын еҥже-шамыч тиде йодыш дене кылдалтше нелылыкым кораҥдаш да классым почмаште полшаш сӧреныт.

– Чаманен каласыман, инвалид икшывым туныктымо дене кылдалтше федеральный кугыжаныш стандарт чылаж годым регионлашет чарак дене вашлиялтеш.  Мутат уке, ме тиде йодышым ӧрдыжеш огына кодо. Ончыкыжымат тудым тӱткын эскераш тӱҥалына. Да тиде тунемме ий тӱҥалтыш марте тазалык шотышто ойыртемалтше йоча-влаклан  класс  шке омсажым почеш манын ӱшанена, – ойлен Калык фронтын регионысо штабшын сопредседательже Александр Кузнецов.

Л.ШАБДАРОВА.

Опубликовать в Одноклассники

Добавить комментарий