С.Г.Чавайн лӱмеш национальный библиотекын книгам аралыме оралтыжын леведышыжым ачалаш Марий Эл Республик вуйлатыше ик миллион теҥгем ойырен, палемда Марий Эл Республик вуйлатышын организаций-аналитике виктемже.
Шийвуйндо Марий Эл правительствын шапаш фондшо гыч кая. Тидлан келшыше пунчалыш регион вуйлатыше, Марий Эл правительстве председатель Александр Евстифеев кидпалыжым пыштен.
Тӱвыра, печать да калык-влакын пашашт шотышто министерстве велым окса С.Г.Чавайн лӱмеш национальный библиотекын книгам аралыме оралтыжын леведышыжым олмыкташ кучылталтеш. 1964 ийыштак чоҥымо книгам аралыме корпусышто чылаже 700 тӱжем единице изданий уло. Чоҥымо деч вара зданий капитально олмыкталтын огыл, сандене жап эртыме семын да игече условийлан кӧра верын-верын шелышталтын, леведыш шӱтлен, кермыч пырдыж катлылын, пу окна раме шӱйын, тӱжвал велжат шелышталтын. Карниз шаланымылан кӧра зданий кӧргыш лум-йӱр пура.
Палемдыман, С.Г.Чавайн лӱмеш национальный книгагудым олмыкташ кӱлмӧ нерген Марий Эл вуйлатыше тылзе тӱҥалтыштак Марий Эл Республикын кугыжаныш национальный политикын концепцийжым вияҥдыме шотышто правительственный комиссийын заседанийыштыже палемден. Александр Евстифеев Чавайн лӱмеш библиотекым Марий кундемыште ик эн кугу да ик эн тӱҥ книгагудылан шотла, вет лач тушто верысе ден тӱнямбалсе изданийлаште Марий Эл нерген савыктыш-влакым чумырат да аралат.
