Марий Эл Республикын тазалыкым аралыме министрже М.Панькован вуйлатымыж почеш, регионысо тӱҥ врач-влак Казань, Киров, Нижний Новгород да Ижевск медицине вузлам целевой направлений почеш тунем лекше самырык специалист-шамыч дене вашлийыныт. Тиде мероприятийыште Казань кугыжаныш медицине университетын диплом деч варасе шинчымаш шотышто проректоржо А.Маловат лийын.
Тений 55 целевик паша биографийжым участковый терапевт, педиатр, стоматолог семын тӱҥалеш. Куд ий ончыч пеҥгыдемдыме ойпидыш дене келшышын, самырык врач-влак республикыштына кум ий деч шагал огыл жап пашам ыштышаш улыт. А сай шинчымашым ончыктышо 38 выпускник ординатурышто тунемаш тӱҥалеш.
Тиде кечынак специалист-влаклан паша верым шеледеныт. Мутлан, Волжск оласе рӱдӧ эмлымверыш кок участковый врач-терапевтым колтеныт. Ончыкыжым тиде медицине тӧнежыште пашам ыштышашлан кум выпускниклан травматологий, анестезиологий да реанимаций, неврологий шотышто ординатурыш тунемаш каяш темленыт.
Чуваш да Мордва университет-влакым тунем лекше-шамычлан паша верым изиш варарак шеледат.
М.ИВАНОВА.
