УВЕР ЙОГЫН

«2019 ийыште каныш кече-влакым кусарыме нерген» пунчалжын проектшым ямдылыме

Россий кучемын «2019 ийыште каныш кече-влакым кусарыме нерген» пунчалжын проектшым ямдылыме. Тудын дене келшышын, Российыште У ий каникул 10 кече шуйна, майыште вич да ныл кече канена. 

Пайрем, тыгак каныме жаплан логалше 5 да 6 январьым изарнялан да кугарнялан толшо 2 да 3 майыш, шуматкечылан толшо 23 февральым 10 майыш (кугарня) кусараш темлыме.

Тыгеракын, 2019 ийыште россиян-влак 2018 ий 30 декабрь гыч 2019 ий 8 январь (У ий да Рошто каникул-влак), 23 гыч 24 февраль (Элым аралыше-влакын кечышт), 8 гыч 10 март (Ӱдырамаш пайрем), 1 гыч 5 май (Шошо да паша пайрем), 9 гыч 12 май (Сеҥымаш кече) йотке, 12 июньышто (Российын кечыже), 2 гыч 4 ноябрь марте (Калыкын икоян улмо кечыже) канат.

М.ИВАНОВА

Опубликовать в Одноклассники

Добавить комментарий