Марий Эл Республикым вуйлатыше Александр Евстифеев регионышто пӱртӱс поянлык дене пайдаланыме да йырым-йырысе средам аралыме йодышла шотышто совещанийыште лийын. Тиде мероприятийым Российын пӱртӱс поянлык да экологий министрже Дмитрий Кобылкин вӱден.
Мутланымаш «региональный шагат» кышкарыште да видеокыл форматыште эртен. Совещанийыште кӱлешан ятыр йодышым лончылымо, но поснак кугу тӱткышым шӱкшакым пайдалын виктарыме темылан да РФ Президентын «Россий Федерацийыште 2024 ий марте национальный цель ден вияҥме стратегический задаче-влак нерген» пунчалжын йодмашыже-шамычын шукталтмыштлан ойырымо.
Д.Кобылкин регионын шӱкшакым виктарыме у системылан ямдылалтмыже, РФ Президентын майысе пунчалже-влак шотышто экологий блокым илышыш шыҥдарыме план, чодырасе обстановко, лекше нелылык-влак нерген йодыштын, тыгодымак шке велым лийме семын полшаш ямде улмышт дене палдарен. .
А.Евстифеев экологий сферысе национальный проект-влакын целевой показательыштым шке жапыштыже шукташ палемдыме нерген ойлен. «Республикна каласыме чыла йодыш дене чолган пашам ышта. Национальный проектын целевой показательже – мемнан задачына», – палемден тудо.
Регионым вуйлатышын мутшо почеш, пытартыш ийлаште санкционироватлыдыме 130 свалкым пытарыме. Таче кечылан тыгай сынан объектым республикыштына регистрироватлыме огыл. Шӱкшакым айда-йӧра кышкыме вер-влак йырым-йырысе средам аралыме шотышто инспектор-шамычын да Мер экологий советын тыршымышт дене рашемдалтыт да кораҥдалтыт. Кундемыштына пеҥгыде коммунал шӱкшакым кышкыме 18 полигон уло, идалыкыште 100 тӱжем тонн куатан шӱкшакым сортироватлыме комплекс пашам ышта. Но нелылыкат уке огыл: тиде комплексын ойырымо вторсырьёжым налше шагал. Республикыштына икмыняр ий ончыч ныл янда завод пашам ыштен гын, кызыт – иктат уке, сандене пластик ден яндам нигуш чыкаш.
Марий Эл Республик вуйлатышын организаций-аналитике виктемжын уверже негызеш М.ИВАНОВА ямдылен.
