УВЕР ЙОГЫН

Тӱнямбал чемпионат-2018: Историеш сай кышам кодат

Футбол дене тӱнямбал чемпионат гӱжлен эртыш. Шуко еҥ тургыжланен, ятыр эл гыч фанат-влак шке командыштым ончаш толыныт. Чыла команде могай улмыжым ончыктен, тыршен. Российын сборный командыжат 1,4 финалышке шуын, тыге  ты у состав футболын историешыже ойыртемалтше сай кышам кода. Чемпион – Францийын сборныйжо. 

15 июльышто Москвасе «Лужники» стадионышто шокшо таҥасымаш эртен. Француз-влак тӱҥалтыш гычак ӱшанлын ончылно каеныт. Иктешлымаш: Хорват-влакым 4:2 счёт дене сеҥеныт. Кокымшо  верыште – Хорватий. Бельгий бронзо призёр лийын.

Ты чемпионатын эн сай модшыжлан Францийын сборныйжо гыч футболист Килиан Мбаппем палемденыт. Тиде ты рвезын икымше чемпионатше гынат, шкенжым моткоч тале да опытан спортсмен семын ончыктен. Бельгий сборный команде дене модмаште тудын йолтаган дене пасым пуымыжак мом шога!.. Тыге тудо пуйто шӱлыкан матчыш оҥай ойыртемым пуртен. «Такшым тудо ойыртемалташ йєрата», – манын палемдат шукышт.

– Еҥ-влак тыглай илыш деч жаплан кораҥаш толыт. Тидым пагалаш кӱлеш. Меат ончаш толшо-шамыч  верыштышт ласкан шинчен ынышт керт манын, оҥай да сай модмашым ончыктышаш улына. Матч деч вара шыргыжалын малаш возышт. Футбол кызытат йоча годсо жапысе семынак куаным луктеш. Миллион еҥат тыгаяк кумылан лиеш, шонем, – ойлен финал модмаш деч ончыч Мбаппе интервьюштыжо. Оҥай, 1998 ийыште Франций тӱнямбал чемпион лийын. Лач тиде ийын Мбаппе шочын. Тыге у тукымат виян улмыжым пеҥгыдемден.

Палаш уто огыл: Америкысе спорт портал Российын сборныйжо гыч полузащитник Денис Черышевым шке национальный командыжын эн сай бомбардирже семын палемден.  27 ияш Черышев 5 матчыште 4 голым пуртен.

Денис Черышев – Российысе, но Испанийын командыжлан модшо футболист. «Вильярреал» испанский клублан модеш.  1990 ий 26 декбрьыште Нижний Новгородышто шочын. Полузащитник. Дмитрий Аленичев  деч вара тудо – Европа кӱкшытан кок турнирыште (чемпион-влакын лигышт 2015/2016 «Реал» составыште да Европын лигыже 2013/2014 «Севильи» составыште) кокымшо российский сеҥыше. Ачаже, Дмитрий Черышев – Москвасе «Динамо» командын модшыжо. Денисын вич ияш улмыж годым тудлан Испанийысе «Спортинг» клублан модаш темленыт. Тыге Черышевмыт еш  Испанийыш илаш куснен.

Такшым эн сай футболист коклаште сӱрет тыгай:

Тибо Куртуа (Бельгий), Гарри Магуайр (Англий), Йерри Мина (Колумбий), Диего Годин (Уругвай), Киран Триппьер (Англий), Лука Модрич (Хорватий), НГоло Канте (Франций), Денис Черышев (Россий), Филиппе Коутинью (Бразилий), Кевин де Брейне (Бельгий), Кильан Мбаппе (Франций).

Эн сай тренер семын Бельгийын наставникше Роберто Мартинесым шотленыт.

Францийын сборный командыж гыч икмыняр футболист жаплан Россиеш коднешт манын ойленыт. Нунылан тыште чылажат келшен. Иктыже эсогыл  шке карьерыштыже тиде чемпионатым эн сай турнир семын палемден. Такшым чемпионат, Российысе калыкын вашлиймыже шуко фанатлан, футбол дене сборный командылан келшен.

Е.Эшкинина.

Опубликовать в Одноклассники

Добавить комментарий