УВЕР ЙОГЫН

Йошкар-Ола воктенсе «Корта» ече базыште ече-роллер трассым реконструироватлат

Марий Эл вуйлатыше А.Евстифеевын кӱштымыж почеш, Йошкар-Ола воктенсе «Корта» ече базыште ече-роллер трассым реконструироватлат. Тидын нерген тудо учебно-тренировочный ече базым ончен лекмыж годым ойлен. Тидлан амалже Марий Эл вуйлатыше А.Евстифеев спортын кумдан шарлыше видше, ече дене куржталмашын вияҥмыж нерген Российысе ече федерацийын президентше, тӱнямбал чемпионко Елена Вяльбе дене каҥашыме деч вара лектын.

Тӱҥалтышлан Корташте ече-роллер трассыште телылан тулым келыштарышаш улыт. Республик вуйлатыше монтажлан конструкцийым тергаш, кӱлеш детальым муаш темлен. А.Евстифеевын шонымыж да калыкын йодмыж почеш,  трассе кеҥежым велосипед да ролик дене кудалышташ, а телым ече дене мунчалташ келшыше лийшаш.

– Трассыште тул лийже манын, средствам ойырыман да корным  волгалтарыман. Корным ыштыме шотыштат икмыняр вариант уло. Иктыже – тенияк ышташ, кокымшо – тений тӱҥалаш гына, кумшо – бюджетыш пурташ да икымше январь гыч, средствам ойырен, трассым чоҥаш, – манын тудо профильный министерстве-влакын вуйлатышыштлан да верысе кучем представитель-влаклан.  

Тыгак А.Евстифеев базе кумдыкым тӱзатыме нерген ойлен.

– Унагудо ончылно площадкылан район вуйын шогышаш. Бизнеслан эҥертыза. Кугыжаныш-частный партнерство эн сай йєн. Чылалан раш: чыла тидым ме рӱдєлаште, Медведево районышто илыше-влаклан ыштена, – манын палемден республик вуйлатыше.

Самырык-влакын политикышт, спорт да туризм министр Л.Батюкован палемдымыж почеш, ече дене куржталмаш Марий Элыште спортын базовый видшылан шотлалтеш. Олимпийский резерв школ уло. Тудыжо тений шке статусшым эше ик гана пеҥгыдемден. 2019 ийыште ты школлан оборудованийым налаш 920 тӱжем теҥге субсидий ойыралтшаш. Тылеч посна РФ-н бюджетше гыч 4 миллион наре теҥгем тренер-влакым профессионально ямдылымылан ойырышаш улыт.

Е.Эшкинина.

Опубликовать в Одноклассники

Добавить комментарий