10 ияш ӱдырланна Йошкар-Ола воктенсе йоча лагерьыш путёвкым налынна. Настюшнан тазалыкше пеҥгыдыжак огыл: шийше мардежыш логалеш але йӱштым кочкеш-йӱеш гын, я нерже петырна, я логарже пуалеш, я температуржо кӱза, тыгак южо кушкыллан, кочкышлан аллергий палдырна… Рашемдынем ыле: лагерьыш тарваныше икшывын чемоданышкыже аптечкым пышташ лиеш мо?
Н.Казакова.
Морко район.
Йодышлан Марий Эл Республикын тӱҥ педиатрже Галина Мурзаева вашешта:
– Лагерьыште черланыше икшыве вигак медпунктыш кайышаш. Йоча шкенжым шке эмлышаш огыл! Тидым ӱдырланда обязательно каласыза. Лагерьыш толшо йочан чемоданыштыже нимогай эм лийшаш огыл! А икшыве черланак гын, лагерь пашаеҥ-влак тидын нерген ача-аважлан увертарышаш улыт. Лагерь кумдыкышто келшыше медицине полышым пуэн кертдыме годым йочам рӱдоласе медицине тӧнежыш кондат.
Редакций деч: Роспотребнадзорын Марий Эл Республикысе виктемжым вуйлатыше Светлана Булатован мутшо почеш, кызыт вийыште улшо санитарный правил-влак дене келшышын, чыла йоча лагерьым медицине персонал дене комплектоватлыме да изоляторан медицине пункт дене шыҥдарыме.
М.ИВАНОВА.
