Медицине полышым жапыштыже пуымо нерген мутымат лукман огыл. Мер палатын социальный йодыш шотышто комиссийже «йыргешке ӱстел» йыр Марий Элын тора кундемлаштыже медицине обслуживанийын «сӱретшым» лончылен.
Тазалыкым аралыме министр Марина Панькован мутшо почеш, регионысо 1621 илем гыч 79 яллан икымше медико-санитарный полышым пуымо шотышто нелылык палдырна. Тышечын 56 пунктшо – 1 гыч 100 марте еҥан илем. «Йыргешке ӱстел» йыр погынышо-влак нине села ден яллаште медицине полышым пуаш лийме йӧным кычалыныт. Тыгодым райрӱдӧ деч палынак тораште верланыше ялыш транспорт пурен кертме, илемлашке лектын коштшо врач-влак бригадын формыж ден кугытшым сай велыш вашталтыме, телемедицине консультацийым эртарыме, суткаш койко-влакым шындыме, кӱкшӧ технологичный медицине полышым вияҥдыме, республикыштына Вашкеполышын единый диспетчер службыжым ыштыме, отрасльыш кадрым ситарыме йодыш-влакым тарватеныт.
Мер палатын еҥже-влак министр М.Панькова деч отрасльым финансироватлыме, койко сетьым иземдыме-кугемдыме, Кугыжаныш Погын депутат-влакын регионысо здравоохраненийлан кузерак полшымышт нергенат йодыштыныт да регионысо калыкын тазалыкшым аралыме кумдыкыш мер пашаеҥ ден эксперт-шамычым ушаш темленыт.
Тазалыкым аралыме министерствын пресс-службыжын палемдымыж почеш, йыргешке ӱстел йыр мутланымаш чылалан пайдалын эртен.
М.ИВАНОВА.
