Марий Эл вуйлатыше Александр Евстифеев кушкыжмын Йошкар-Оласе чоҥымо объектлам ончен савырныме паша дене келшышын, «Мостремстрой» кугыжаныш унитарный предприятийыште лийын.
Пашадарым жапыштыже тӱлыдымылан кєра ӱмаште коллективыште сӱрет неле лийын. Пашаеҥ-влак ончылно окса парымым петырышашлан республикын правительствыже полышым жапыштыже пуэн. Кызыт предприятий у паша йыжыҥлан ямде.
«Мостремстрой» регионысо чоҥымо рыноклан бетоным, цемент ден известка растворым, кӱртньє да бетон конструкций-влакым – плитам, свайым, тротуар плиткым да молым — ыштен луктеш.
Александр Евстифеев производственный базым ончен лектын. Тушто предприятийын автомобиль веле огыл, трактор техникыжат улыт. Тыгак кӱртньє да бетон конструкций-влак заводышто лийын. Республик вуйлатышым директор Андрей Лежнин ужатен коштыктен.
— Ий еда ме 16 тӱжем кубометр бетоным, 18 тӱжем яра кєрган шарышаш плитам ыштен луктына. Мемнан полигон кӱварлан, пучпроводлан чыла конструкцийым ямдыла, — ойлен Александр Евстифеевлан.
Тыгак тудо компанийын кызыт шуктымо пашаже да чоҥымо объектше-влак нерген каласкален. Иктыже – У Торъял районышто Талман эҥер гоч кӱвар. «Мостремстройын» эше кум объектше Крымыште да икте Татарстан Республикыште улыт.
Директорын ойлымыж почеш, чоҥымо материаллан йодмаш мыняр пурымо кугыт идалык пагыт дене кылдалтеш. Кеҥежым – шукырак, телым шагалрак лиеда. Туге гынат компаний шке ончыланже кугу задачым шында. Тидым республикын правительствыжат сайлан шотла.
— Тиде республикысе чоҥымо комплексын ик эн кӱлешан предприятийже. Тудо кызытат неле экономический положенийыште. Тиде – ГУП, сандене республикын правительствыже полша. Кызыт производство программым шарыме да сатум шукырак ыштен лукмо йєн-влак шымлалтыт. Шушаш жапыште кугу скоростян кӱртньыгорно магистральым чоҥаш тӱҥалшаш вашеш тидыже поснак кӱлешан. Предприятийыште кугу кӱкшытан специалист-влак шукын пашам ыштат. Предприятий умбакыжат вияҥже манын, ме коллективым арален кодышаш улына, — каласен Марий Эл вуйлатыше.
Тыгак Александр Евстифеев Йошкар-Оласе Комсомольский урем, 53 адрес дене верланыше чоҥен шуктыдымо шуко пачашан пєрт объектыште лийын. Тудын застройщикше – «Марий Эл Республикын правительствыжын капитально чоҥымаш управленийже» кугыжаныш унитарный предприятий.
Пєртым ончен савырныме деч ончыч республик вуйлатыше застройщик дене объектым кунам пашаш колтымо, воктенсе кумдыкым тӱзатыме, инфраструктурым вияҥдыме йодыш-влакым каҥашен. План почеш тудым шыжым сдатлышаш улыт.
— Чоҥымо пашам писынрак ыштыман. Пєртым сентябрь мучаш марте чоҥен шуктыман, парымым пытарыман, илыме верым дольщик-влаклан пуыман, — каласен Александр Евстифеев.
Индеш пачашан пєртын пачерлаштыже кызыт кєргє отделкым ыштат. Проект дене келшышын, воктенсе кумдыкышто физкультур дене заниматлаш, йоча-шамычлан модаш да илалше-влаклан каналташ площадке-влак лийшаш улыт, палдара Марий Эл Республик вуйлатышын организаций-аналитике виктемже.
Л.Камалетдинова.
