8 июльым Еш, йӧратымаш да ӱшанле улмо кечылан увертарымылан тений 10 ий темеш. Тидым шотыш налын, шушаш рушарнян Йошкар-Олаште тудо молгунамсе деч кумдан палемдалтеш.
Пайремым республикысе Социально вияҥмаш, Тӱвыра, печать да калык-влакын пашашт шотышто, Самырык-влакын политикышт, спорт да туризм, Образований да науко министерстве-влак, Митрополий, ола администраций иквереш ямдылат. Тиде пайремыш Марий Эл вуйлатыше Александр Евстифеев мийышаш.
Тӱҥ мероприятий-влак кум вере эртат:
— Йошкар-Оласе Патриарший площадь рӱдӧ площадке лиеш. Тушто пайрем лӱмеш концертым ончыктат, «За любовь и верность» медаль дене палемдалтше да «Идалыкын ешыже» Всероссийский конкурсын регионысо этапыштыже сеҥыше-влакым саламлат. Тидын дене пырля тӱрлӧ конкурс, йоча-влаклан викторине, мастер-класс, кидмастар-влакын выставке-ярмиҥгашт лийыт.
— Чарла Кремльыште икшыве-шамычлан модыш программе-влак эртат.
— Йошкар-Оласе рӱдӧ каныме паркыште самырык еш-влакын фестивальышт лиеш. Тыгак йоча-влакым тӱрлӧ модыш программе дене куандарат.
Л.Камалетдинова.
