УВЕР ЙОГЫН

Азап: Писын кудалме туткарыш шуктен

Вӱргечын, 20 июньышто, У Торъял — Йошкар-Ола кугорнын 2-шо километрыштыже кугу аварий лийын: Hyundai Solaris ден «Нива» ваш миен керылтыныт. 

Кызытеш рашемдыме почеш, иномаркын водительже, таксист, вес машинам эртен каяш тӧчен. Но утыжден писын кудалмыжлан кӧра автомобильым виктарен кертын огыл да ваштареш корныш лектын.

Марий аварийно-утарыше службо палдара: корно туткарыште «Нива» автомобильым виктарыше 70 ияш пӧръеҥ, Hyundai Solaris машинан водительже да 64 ияш пассажир ӱдырамаш коленыт. 23 ияш самырык ӱдырамаш ден 8 тылзаш йочаже илыше кодыныт. Икшывым йоча республиканский эмлымверыш наҥгаеныт.

Тиде шучко туткарым Марий Эл Республикын правительствыже контрольыш налын. Правительстве председательын алмаштышыже Степан Воронцов ДТП лийме кечынак совещанийым эртарен. Тушто туткарын амалжым, тышке мо шуктен кертмым каҥашеныт.

Л.Камалетдинова.

Опубликовать в Одноклассники

Добавить комментарий