17 июньышто Йошкар-Оласе «Дружба» стадионышто республик кӱкшытан ялысе кеҥеж модмаш эртен. Тений тушко улыжат вич район гыч участник-влак ушненыт. Тидыжлан амалжат уло: окса чӱдылык.
Модмаш индеш вид дене эртаралтын гын, обязательный семын ялысе паша дене кылдалтше дояр, механизатор, шудым солышо-влакын таҥасымашышт шотлалтын. Участник-шамыч тыгак масс-рестлингыште, куштылго атлетикыште, самбошто, кира спортышто вийым тергеныт. Тыгак спорт еш команде-влак коклаште шокшо ӱчашымаш эртен.
– Советский районысо участник-влак вич видыште икымше лийыныт. Тиде – дояр-влак Анастасия Артемьева ден Юрий Таныгин, механизатор-шамыч Алёна ден Александр Таныгинмыт (ачаж ден ӱдыржє), шудым солышо-влак Виктория Кузнецова ден Геннадий Бирюков, – ойла Советский районышто физкультур да спортлан вуйын шогышо В.Шабалин. – Кугурак ӱдыран еш команде-влак коклаште Васильевмытым, изирак рвезан командыште Гусевмыт ешым мокталтыман. Чыла район гыч толыт гын, шокшо да тале таҥасымаш лиеш ыле. Пытартыш жапыште ялысе-влак кумылын огыт ушно. Тидыжым окса укелык денат кылдаш лиеш.
Тале таҥасымаште икымше верыш У Торъял район, кокымшыш Советский, кумшыш Кужэҥер район-влак лектыныт. Нылымше верыш Медведево район лектын гын, визымшыш – Марий Турек район гыч толшо команде. Тыгак Морко район гыч кирам нєлтышє-влак ойыртемалтыныт.
Ончыко лекше, ойыртемалтше участник-влакым республикнан сборный командышкыже чумырат. Нуно всероссийский ялысе кеҥеж модмаште Марий Элын чапшым аралаш тӱҥалыт.
Е.Эшкинина.
